1 जून ले कलेक्टर्स मन दिहिन रोज के रिपोर्ट, संवेदनशील इलाका अउ बड़े बांध मन म रखी जाही चौबीसों घंटा नजर
रायपुर, आगू आए वाला मानसून के बेरा जनउती आफत (प्राकृतिक आपदा), खास करके बाढ़ के स्थिति ले निपटे बर राज सरकार के अलग-अलग बिभाग मन कोति ले करे गय तइयारी के गहिर समीक्षा करे गीस। राहत सिविर मन के संचोई ले लेके आफत प्रबंधन (आपदा प्रबंधन) ले जुड़े जम्मो जरूरी बात मन म बड़ योजना तइयार करे गीस। छत्तीसगढ़ के मुख्य सचिव विकासशील के अगवाई म आज मंत्रालय (महानदी भवन) म राज स्तरीय उच्च स्तरीय बाढ़ नियंत्रण समिति के अब्बड़ जरूरी बईठक सिराइस।
कलेक्टर्स मन ला कड़क निरदेस- 1 जून ले सुरू होही रोज के मॉनिटरिंग
मुख्य सचिव ह राज के जम्मो जिला कलेक्टर्स अउ जिला आपदा प्रबंधन प्राधिकरण के अधेछ (अध्यक्ष) मन ला मानसून 2026 ला देखत सुरिछित अउ राहत व्यवस्था ला चकट-चमकट (चुस्त-दुरुस्त) करे के हुकूम दिन। जम्मो कलेक्टर्स मन ला आगू 1 जून ले रोज दिन पानी गिरय (वर्षा) के स्थिति अउ ओकर ले होय वाला नुकसान के जानकारी जरूरी रूप से सरकार ला भेजे बर लगही। हर जिला म बाढ़ नियंत्रण बर बिसेस नोडल अधिकारी मन के भरती तुरंते पूरा करे के निरदेस दिन।
राज अउ जिला स्तर म बाढ़ नियंत्रण कछ (कंट्रोल रूम) तइयार
बईठक म राजस्व अउ आपदा प्रबंधन बिभाग के अधिकारी मन बतॉइन कि परदेस म जून महीना म मानसून के सक्रिय होय के संभावना हे। आफत के समय तुरंते सहायता अउ तालमेल बर राज स्तरीय बाढ़ नियंत्रण कछ (कंट्रोल रूम) ला चालू कर दे गय हे। जरूरी संपर्क नंबर (स्टेट कंट्रोल रूम) राज स्तर म फोन नंबर 0771-2223471, 0771-2221242 अउ फैक्स नंबर 0771-2223472 ए। एकरे संग च जम्मो जिला मुख्यालय मन म घलो जिला स्तरीय कंट्रोल रूम बना दे गय हे। बईठक म मुख्य सचिव ह बाढ़ अउ जादा पानी गिरे के स्थिति म मनखे मन के जान के नुकसान ला सुन्ना (शून्य) रखे बर बिभाग मन ला ओकर जिम्मेदारी सउंपिन।
खाद्य, स्वास्थ्य अउ लोक स्वास्थ्य यांत्रिकी बिभाग
पहुंच ले बाहिर अउ संवेदनशील इलाका मन म रासन, नून, घांसलेट (केरोसिन) अउ जान बचाए वाला दवई मन के पहिली ले भंडार करना अभी ले पक्का करे जाय। बाढ़ के संसो वाले इलाका मन बर बिसेस डाक्टर मन के टोली बनाए जाय। गांव अउ सहर के इलाका म पीए के पानी के साधन मन के तीर-तखार म साफ-सफाई रखे अउ ब्लीचिंग पाउडर के पूरा सरजाम (उपलब्धता) पक्का करे के निरदेस दिन।
जल संसाधन, नगर सेना अउ नागरिक सुरिछा
हर बछर बाढ़ ले प्रभावित होय वाला खला (निचले) इलाका मन के पहिचान करके उहां चौबीसों घंटा नजर रखे जाय। बाढ़ ले बचे के सामान अउ मोटरबोट मन के तुरंते मरमत्त करवा ले जाय। नगर सेना अउ नागरिक सुरिछा के अमला ला अलर्ट मोड म रहे बर कहे गीस। बड़े बांध मन के पानी बढ़े म पानी छोड़े के कम से कम 12 घंटा पहिली खला जिला मन अउ तीर-तखार के राज मन ला चेतौनी (अलर्ट) जारी करना जरूरी होही।
लोक निर्माण, वन अउ नगरीय प्रशासन बिभाग
परदेस के जर्जर अउ कमजोर हो चुके पुल-पुलिया, रपटा अउ सरकारी भवन मन के पहिचान करके तुरंते सुधार करे जाय। दुर्घटना वाले जघा म बैरियर अउ सूचना पटल लगाए जाय। बाढ़ प्रभावित मन के घर टूट-फूट जाय के स्थिति म वन बिभाग मियर के डिपो म बांस-बल्ली के पूरा भंडार रखय। नगरीय निकाय मन ला मानसून के बेरा सहर मन के जम्मो छोटे-बड़े नाली मन के लगातार सफाई पक्का करे के निरदेस दिन, ताकि पानी भरे के स्थिति झन बनय।
कृषि बिभाग अउ मौसम केंद्र
मौसम विज्ञान केंद्र कोति ले जारी भारी पानी गिरे के चेतौनी ला समे म जिला कंट्रोल रूम अउ आम जनता तक पहुंचाए जाय। किसान मन ला मोबाइल ऐप के माध्यम ले मौसम के पहिली जानकारी भेजे जाय। बाढ़ ले फसल मन ला होय वाला नुकसान के सरवे राजस्व, कृषि अउ उद्यानिकी बिभाग के अधिकारी मन मिल के करिहें अउ तुरंते रिपोर्ट सरकार ला सउंपिहें।
जर्जर भवन अउ आपदा प्रबंधन ऐप म बिसेस जोर
मुख्य सचिव ह नगरीय इलाका मन म बने जर्जर अउ खतरनाक भवन मन के लगातार देख-रेख करे अउ उहां रहइया लोगन मन ला समे रहत सुरिछित जघा म भेजे के निरदेस दिन। मनखे मन के सुरिछा बर अलग-अलग आपदा प्रबंधन अउ मौसम के जानकारी देवइया मोबाइल ऐप के बड़ परचार-परसार करे म घलो जोर दे गीस।
ए बड़ बईठक म राजस्व अउ आपदा प्रबंधन बिभाग के सचिव शम्मी आबिदी, कृषि बिकास अउ किसान कल्यान बिभाग के सचिव सिद्धार्थ कोमल परदेशी, नगरीय प्रशासन बिभाग के सचिव आर. शंगीता, ऊर्जा बिभाग के सचिव सारांश मित्तर, वित्त बिभाग के बिसेस सचिव शीतल शाश्वत वर्मा के संग गृह, स्वास्थ्य, लोक निर्माण, खाद्य, जनसम्पर्क, रेलवे, दूरदर्शन, रेडक्रॉस सोसाइटी अउ भारत संचार निगम लिमिटेड के बड़ अधिकारी मन उपस्थित रहिन।
