- मुख्यमंत्री ह जारी करिन महतारी वंदन योजना के 29वीं किसमत, 66 लाख से जादा माईलोगन मन के खाता में डीबीटी ले 626.25 करोड़ रुपिया भेजीस
- 29 किसमत (किश्तों) में अब तक 18,805.83 करोड़ रुपिया सोझा माईलोगन मन के खाता में पहुंचिस
- ‘लखपति दीदी’ संग आन-आन योजना मन से नोनी-बऊ मन के आरथिक भागीदारी अउ आत्मनिर्भरता ला मिलत हे नवा मजूती
रायपुर, मुख्यमंत्री विष्णु देव साय ह आज राजधानी रायपुर में बने मुख्यमंत्री निवास कार्यालय से महतारी वंदन योजना के 29वीं किसमत ला जारी करत हुए प्रदेश के 66 लाख से जादा दाई-बहिनी मन के बैंक खाता में सोझा (डीबीटी के माध्यम से) 626.25 करोड़ रुपिया के रासी ट्रांसफर करिन। ए मौका में महिला एवं बाल विकास मंत्री लक्ष्मी राजवाड़े घलो हाजिर रहिन।
मुख्यमंत्री विष्णुदेव साय ह प्रदेश के जम्मो दाई-बहिनी मन ला बधाई-दुआ देवत कहिन कि महतारी वंदन योजना ह माईलोगन मन के सम्मान, आत्मनिर्भरता अउ आरथिक स्वावलंबन के नवा पहिचान बन चुके हे। ओमन कहिन कि राज्य सरकार ह महिला मन के आरथिक भागीदारी ला बढ़ाए अउ ओमन ला आत्मनिर्भर बनाए के संकलप के संग लगातार बूता करत हे। ओमन बताइन कि आज के किसमत ला मिला के योजना के तहत अब तक 29 किसमत में कुल 18,805.83 करोड़ रुपिया के रासी सोझा माईलोगन मन के बैंक खाता में डारे जा चुके हे।
मुख्यमंत्री साय ह कहिन कि जसस्वी प्रधानमंत्री नरेंद्र मोदी के अगुवाई में देसभर में नारी शक्ति के सशक्तिकरण के जे बड़ अभियान चलत हे, छत्तीसगढ़ सरकार ओही संकलप ला पूरी निष्ठा के संग भुइँया में उतारत हे। ओमन कहिन कि प्रदेश के आन-आन जिला मन के दौरा के बेरा दाई अउ बहिनी मन ह खुद ओला बताथें कि महतारी वंदन योजना से मिले रासी ह ओकर जीबन में नीक बदलाव लाए हे। कतकोन महिला मन ह ए पइसा ले छोटे-मोटे धंधा-ब्यवसाय सुरू कर दे हें, कतकोन ह सिलाई-कढ़ाई अउ खुद के रोजगार अपनाए हें, त ओही चेटी बड़ संख्या में परिवार मन ह लइका मन के पढ़ाई-लिखाई, सुघ्घर सेहत अउ रोज के जरूरत मन ला पूरा करे बर एकर परयोग करत हें। ओमन कहिन कि महिला मन के ये अनुबव ह ए योजना के असली सफलता अउ ओकर दूरगामी समाजिक असर के गवाही आय।
मुख्यमंत्री साय ह कहिन कि राज्य सरकार ह महतारी वंदन योजना के संग-संग ‘लखपति दीदी’ अइसन आन योजना मन के माध्यम से घलो माईलोगन मन के कमाई ला बढ़ाए, ओमन ला आरथिक रूप से मजूत बनाए अउ आत्मनिर्भरता के डहर आगे बढ़ाए बर लगातार बूता करत हे। ओमन अधिकारी मन ला निरदेस दिन् कि ई-केवाईसी (e-KYC) के परक्रिया ला बेरा में पूरा करके सौ फीसदी (शत-प्रतिशत) पात्र महिला मन तक योजना के लाभ पहुंचाना तय करे जाए। बिसेस रूप से बस्तर संभाग में ए काम ला पहिली प्राथमिकता के संग पूरा करे के निरदेस घलो दिन्।
जानबा होवय कि महतारी वंदन योजना ह 1 मार्च 2024 से प्रदेश में लागू करे गए हे। ए योजना के तहत 21 बछर या ओकर से जादा उमर के पात्र बिहाहित माईलोगन मन ला हर महीना 1,000 रुपिया के आरथिक मदद सोझा ओकर बैंक खाता में दिए जाथे। महतारी वंदन योजना के माध्यम से महिला मन ला रोज-रोज आरथिक सहारा मिले के संग परिवार के पालन-पोषण, लइका मन के पढ़ाई, सेहत, कुपोषण अउ एनीमिया (खून के कमी) ला रोके बर अउ खुद के रोजगार अइसन काम मन ला घलो नवा मजूती मिले हे।
