रायपुर। धमतरी जिला के नगरी विकासखंड म बहुप्रतीक्षित फुटहामुड़ा नहर निर्माण परियोजना अब तेज़ी ले मूर्त रूप लेत हे। ए महत्वाकांक्षी योजना क्षेत्र के सिंचाई व्यवस्था ल मजबूत करे के संग-संग किसान मन के जीवन म स्थायी सकारात्मक परिवर्तन लाए के दिशा म एक ऐतिहासिक पहल माने जात हे।
गंगरेल जलाशय के सैंडल डैम, ग्राम फुटहामुड़ा ले प्रारंभ होके लगभग 19.74 किलोमीटर लंबा ए नहर परियोजना नगरी विकासखंड के 22 ग्राम के लगभग 1940 हेक्टेयर कृषि क्षेत्र ल सुनिश्चित सिंचाई सुविधा प्रदान करहि। परियोजना के पूर्ण होए ले खरीफ के संग-संग रबी फसल के रकबा बढ़हि, जेखर ले किसान मन के उत्पादन क्षमता अउ आमदनी म उल्लेखनीय वृद्धि होए के संभावना हे।
परियोजना के सुचारु क्रियान्वयन बर प्रशासनिक स्तर म घलो जम्मों आवश्यक प्रक्रिया पूर्ण कर ले गिन हें। मुख्य नहर ले प्रभावित 10 ग्राम म 14.33 हेक्टेयर भूमि के भू-अर्जन पूरा हो चुके हे, उहें वन प्रकरण ले प्रभावित 24.42 हेक्टेयर भूमि के अंतिम स्वीकृति घलो प्राप्त हो गिस हे। ए स्वीकृति के बाद निर्माण कार्य म अवइया जम्मों प्रमुख बाधा समाप्त हो गिन हें अउ कार्य अब निर्बाध गति ले आगु बढ़त हे।
जिला प्रशासन अउ जल संसाधन विभाग के अनुसार, ए परियोजना केवल सिंचाई तक सीमित नहीं रहि, बल्कि एखर ले ग्रामीण अर्थव्यवस्था ल नवा मजबूती मिलहि। सिंचाई सुविधा सुनिश्चित होए ले कृषि आधारित रोजगार के अवसर बढ़हि, किसान मन के आय म वृद्धि होहि अउ क्षेत्र ले होवइया पलायन म घलो प्रभावी रोक लगहि।
ज्ञात हो कि फुटहामुड़ा नहर परियोजना नगरी विकासखंड के किसान मन ल दीर्घकालीन लाभ देवइया योजना हे। प्रशासन के प्राथमिकता हे कि निर्माण कार्य उच्च गुणवत्ता के संग निर्धारित समयसीमा म पूर्ण हो, ताकि ए परियोजना कृषि समृद्धि के संग-संग क्षेत्र के समग्र विकास ल नवा दिशा दे सकय। उल्लेखनीय हे कि हाल ही म उच्च स्तरीय अधिकारी मन द्वारा परियोजना स्थल के निरीक्षण करके निर्माण के प्रगति, तकनीकी पहलु अउ आवश्यक संसाधन के समीक्षा करे रीहिन। अधिकारी मन के मार्गदर्शन म अब कार्य ल अउ अधिक प्रभावी ढंग ले आगु बढ़ाए जात हे। फुटहामुड़ा नहर परियोजना ल नगरी अंचल म हरित क्रांति के नवा शुरुआत के रूप म देखे जात हे।
