राज्य सहकारी विकास समिति के उच्च स्तरीय बैठक संपन्न, पैक्स समिति मन ला बहुआयामी बनाय ऊपर जोर
हर ग्राम पंचायत म होही सहकारी समिति के संचालन; दूध, मछरी अउ लघु वनोपज से जोड़े जाहीं समिति मन ला
शक्कर कारखाना मन म मल्टीफील्ड इथेनॉल संयंत्र के निर्माण म तेजी लाय के निर्देश
रायपुर, छत्तीसगढ़ के मुख्य सचिव विकासशील ह राज्य के सहकारी समिति मन के माध्यम से किसान मन तक खाद, बीज, दंवाई, बैंकिंग अउ रोजगार जइसन बुनियादी सुबिधा मन ला सुलभता से पहुंचाय के निर्देश दिन हे। ओमन राज्य के कृषक मन ला सशक्त बनाय बर सहकारी समिति मन के सुदृढ़ीकरण (मजबूती) ऊपर बिसेस बल दिन हे। मुख्य सचिव ह अधिकारी मन ला निर्देशित करिन हे कि प्रदेश के हर एक ग्राम पंचायत म सहकारी समिति के संचालन सुनिस्चित करे जाय। एकर साथे-साथे प्राथमिक कृषि साख समिति मन ला बहुआयामी सरूप प्रदान करे बर ओमन ला दूध, मछरी पालन अउ लघु वनोपज के काम मन से सोझा जोड़े जाय।
अन्न भंडारण अउ जनकल्याणकारी सुबिधा मन के समीक्षा
मंत्रालय म आयोजित राज्य सहकारी विकास समिति के ए महत्वपूर्ण बैठक म समिति मन के गठन, उद्देस्य मन अउ आघू के कार्ययोजना ऊपर बिस्तार से गोठ-बात करे गिस। सहकारी क्षेत्र के अंतर्गत पैक्स (PACS) गोदाम मन के निर्माण के प्रगति के गहिर समीक्षा करे गिस। समिति मन के माध्यम से प्रधानमंत्री जन औषधि केंद्र अउ कॉमन सर्विस सेंटर जइसन जरूरी सुबिधा मन ला गांव-देहात म बिस्तार करे ऊपर जोर दिय गिस।
राष्ट्रीय समिति मन से जुड़हीं पैक्स, डिजिटल बैंकिंग ला मिलही बढ़ावा
- राष्ट्रीय स्तर म प्रतिनिधित्व: बैठक म राज्य के जम्मो पैक्स समिति मन ला राष्ट्रीय मुख्यधारा से जोड़े बर भारतीय बीज सहकारी समिति, राष्ट्रीय सहकारी निर्यात समिति अउ राष्ट्रीय जैविक सहकारी समिति के अनिवार्य सदस्यता देवाय के रणनीति ऊपर चर्चा करे गिस।
- मक्का अउ दलहन के उपार्जन: समर्थन मूल्य ऊपर मक्का अउ दलहन के सुचारू उपार्जन (खरीदी) बर पैक्स समिति मन अउ किसान मन के पंजीयन NCCF अउ NAFED के आधिकारिक पोर्टल मन ऊपर करे के निर्देश दिय गिस हे।
- माइक्रो एटीएम अउ रूपे कार्ड: ग्रामीण क्षेत्र मन म बैंकिंग ब्यवस्था ला मजबूत करे बर पैक्स, दूध अउ मछरी सहकारी समिति मन म माइक्रो एटीएम (Micro ATM) स्थापित करे अउ जम्मो सदस्य मन ला रूपे (Rupay), किसान क्रेडिट कार्ड (KCC) उपलब्ध कराय के काम मन के समीक्षा करे गिस।
शक्कर कारखाना मन म इथेनॉल प्लांट अउ दूसर महत्वपूर्ण निरनय
मुख्य सचिव ह राज्य के सहकारी शक्कर कारखाना मन म मल्टीफील्ड इथेनॉल संयंत्र मन के निर्माण के प्रक्रिया ला गति देवइ बर तुरंते समुचित कार्यवाही करे के निर्देश दिन। एकर अलावा, राज्य के शहरी सहकारी बैंक मन ला अम्ब्रेला संगठन से जोड़े, जिला सहकारी केंद्रीय बैंक मन म इंटरनेट बैंकिंग सुरू करे, पैक्स कम्प्यूटरीकरण, पीएम किसान समृद्धि केंद्र मन के स्थापना, समिति मन बर ‘श्रैंकिंग फ्रेमवर्क’ तइयार करे अउ पैक्स के माध्यम से ग्रामीण पाइप जलापूर्ति योजना मन के संचालन के प्रगति के घलो मूल्यांकन करे गिस।
ए बैठक म वन अउ जलवायु परिवर्तन विभाग के अपर मुख्य सचिव मनोज पिंगुआ, वित्त विभाग के सचिव डॉ. रोहित यादव, कृषि अउ किसान कल्याण विभाग के सचिव सिद्धार्थ कोमल परदेशी, सहकारिता विभाग के सचिव डॉ. सी.आर. प्रसन्ना अउ आयुक्त सहकारिता महादेव कावरे प्रमुख रूप से उपस्थित रहिन। ए मन के साथे-साथ खाद्य, राजस्व अउ आपदा प्रबंधन विभाग, राज्य सहकारी बैंक (अपैक्स बैंक), भंडारण विकास अउ विनियामक प्राधिकरण, एफसीआई (FCI), राज्य भंडारगृह निगम, नाबार्ड (NABARD), राष्ट्रीय सहकारी विकास निगम (NCDC), राष्ट्रीय दुग्ध विकास बोर्ड अउ राष्ट्रीय मत्स्य विकास बोर्ड के बड़े अधिकारी मन घलो सामिल होइन।
