- सुशासन तिहार: मंत्री टंकराम वर्मा ह झुमका मं मनखे मन ला बांटिन खुसी
- ट्रैक्टर के चाबी अउ चेक पाके खिल गे हितग्राही के चेहरा
रायपुर, छत्तीसगढ़ सरकार के जनकल्याणकारी योजना ला जन-जन तक पहुँचाए के संकल्प के संग सरसीवा तहसील के ग्राम पंचायत झुमका मं ‘सुशासन तिहार’ के तहत जनसमस्या निवारण शिविर के आयोजन करे गिस। ए शिविर मं प्रदेश के राजस्व अउ उच्च शिक्षा मंत्री टंक राम वर्मा सामिल होइन।
मंत्री श्री वर्मा ह शिविर मं विभागीय स्टाल के अवलोकन करिन अउ आवेदन के निराकरण के स्थिति ला जानिन। कार्यक्रम के बखत ओमन हितग्राही ला ट्रैक्टर के चाबी, अनुदान राशि के चेक, प्रमाण पत्र अउ आन सामग्री भेंट करके ओमन ला सशक्त बनाए के डाहर कदम बढ़ा़इन।
ए शिविर मं कुल 2310 आवेदन मिलिस जेमं ले 272 के तुरंते निराकरण करे गिस। एक किसान हितग्राही ला ट्रैक्टर बिसाए बर 2.50 लाख रुपय के अनुदान अउ कतको किसान मन ला बोर खनाए बर 43 हजार रुपय के चेक बांटे गिस। ओसने नन्हे लइका मन के अन्नप्राशन, गरभवती माईलोगन मन ला उपहार अउ आयुष्मान कार्ड घलो बांटे गिस।
गांव वाले मन ला संबोधित करत हुए मंत्री टंकराम वर्मा ह साफ कहिन कि राज्य सरकार ‘अंत्योदय’ के सिद्धांत मं काम करत हे। “प्रधानमंत्री आवास योजना के हर पात्र हितग्राही ला ओकर हक मिलही, एहा सरकार के पहिली प्राथमिकता आय। अधिकारी ए बात ला तय करंय कि शिविर मं मिले एक-एक आवेदन के निराकरण समय-सीमा के भीतर होवय।”
विभागीय लाभ के पिटारा
शिविर मं प्रशासन ह सक्रियता देखावत अलग-अलग विभाग के माध्यम ले बड़े संख्या मं मनखे मन ला लाभान्वित करिन। शिविर मं किसान किताब (पुस्तिका), बी-1 अउ लइका मन ला जाति प्रमाण पत्र दे गिस। ओसने मछरी अउ खाद्य विभाग डाहर ले मछुआरा ला जाल अउ पात्र परिवार मन ला नवा राशन कार्ड सउंपे गिस। दिव्यांग प्रमाण पत्र, पेंशन मंजूरी अउ प्रधानमंत्री आवास के पूरा होय के प्रमाण पत्र बांटे के संग-संग स्वास्थ्य अउ आयुर्वेद विभाग डाहर ले शिविर लगाके गांव वाले के मुफत जांच करे गिस।
कार्यक्रम मं बिलाईगढ़ विधायक कविता लहरे, जिला पंचायत अध्यक्ष संजय पांडेय, अउ ग्राम पंचायत झुमका के सरपंच धनंजय साहू, कलेक्टर पद्मिनी भोई साहू, संग जिला प्रशासन के बड़े अधिकारी अउ कर्मचारी उपस्थित रहिन। बड़े संख्या मं जुटे गांव वाले ह सरकार के ए पहल के सराहना करिन अउ अलग-अलग योजना बर अपन पंजीयन कराइन।
