राजधानी रायपुर ला मिलिस बड़े सौगात, लाखों लोगन मन ला मिलही ट्रैफिक जाम ले राहत
रायपुर, मुख्यमंत्री विष्णुदेव साय ह आज राजधानी रायपुर म कचना रेलवे ओवरब्रिज के लोकार्पण करके एला आम जनता ला अरपित करीन। संग च, 22.79 करोड़ रुपिया के लागत ले बने संकर नगर-खम्हारडीह-कचना रद्दा के चौड़ीकरण काम के घलो लोकार्पण करे गिस। ए मउका म विष्णुदेव साय ह कहीन कि राज्य सरकार प्रदेश म आधारभूत संरचना के बिकास ला सबले पहिली प्राथमिकता देवत हे अउ ए ओवरब्रिज उही डाहर म एक ठन बड़ उपलब्धि आय।
मुख्यमंत्री विष्णुदेव साय ह कहीन कि कचना रेलवे फाटक म लंबा समय ले जाम के समस्य बने रहिस, जेकर ले आम नागरिक मन ला आवागमन म अड़कच्चा के सामना करे बर परत रहिस। ओवरब्रिज के सुरू होय ले अब लोगन मन ला सुगम, सुरक्षित अउ बिना बाधा के यातायात के सुबिधा मिलही। एकर ले बिसेस रूप से कचना, खम्हारडीह अउ आसपास के इलाका के नागरिक मन ला लाभ होही। ओमन कहीन कि केंद्र सरकार के केंद्रीय सड़क निधि योजना के अंतर्गत ए परियोजना ला मंजूरी मिले रहिस।
मुख्यमंत्री ह कहीन कि आज के दिन कचना, खम्हारडीह अउ आसपास के इलाका के लोगन मन बर खुसी के दिन आय। जनता के बछरों जुन्ना मांग आज पूरा होय हे। अब इहां ट्रैफिक जाम अउ गाड़ी मन के लंबा कतार ले राहत मिलही। एकर ले आफिस, स्कूल-कॉलेज जइया लोगन मन के संग च, ब्यापारी अउ ब्यवसायी मन ला घलो बड़े सुबिधा होही। ओमन ए उपलब्धि बर क्षेत्रवासी मन ला बधाई दिहिन।
मुख्यमंत्री ह कहीन कि केंद्र सरकार ले मिले निधि के भरोसा ए ओवरब्रिज के निरमाण संभव होय हे। ओमन एकर बर केंद्र सरकार के आभार जतावत उप मुख्यमंत्री अउ लोक निरमाण मंत्री अरुण साव तथा लोक निरमाण बिभाग के अधिकारी मन ला समय म अउ गुनवत्ता के संग काम ला पूरा करे बर बधाई दिहिन।
उल्लेखनीय हे कि ए ब्रिज के लंबाई 787 मीटर अउ चौड़ाई 13 मीटर हे तथा 48.78 करोड़ रुपिया के लागत ले बने ए ओवरब्रिज के बनय ले रायपुर सहर के यातायात ब्यवस्था अउ जादा मजबूत होही अउ समय के बचत घलो होही।
मुख्यमंत्री ह कहीन कि राज्य सरकार प्रदेश म सड़क, पुल अउ दूसर अधोसंरचना बिकास के काम मन ला तेजी ले आगू बढ़ावत हे, ताकि आम जनता ला अउ अछ्छा सुबिधा मन मिल सकय। ओमन निरमाण काम म जुड़े अधिकारी अउ एजेंसी मन ला बधाई देवत कहीन कि गुनवत्ता वाला निरमाण काम सरकार के पहिली प्राथमिकता आय।
मुख्यमंत्री विष्णुदेव साय ह कहीन कि प्रदेश म अभी सुशासन तिहार के आयोजन करे जावत हे। राज्य सरकार अपन काम मन के रिपोर्ट कार्ड जनता के आगू म रखे के संग च सीधे लोगन मन के बीच म जाके योजना अउ बिकास काम मन के फीडबैक घलो लेवत हे। गामीन अउ सहर के इलाका म समाधान सिविर लगाय जावत हे, जिहां अलग-अलग बिभाग के अधिकारी मन उपस्थित रहके आम नागरिक मन के समस्य मन के तुरते निरकरण करे के कोसिस करत हें।
ओमन कहीन कि जनता के बीच म जाय ले असल परिस्थिति के जानकारी मिलथे। ओमन खुद अचकचा ले गांव मन म पहुंच के रुख के खला म चौपाल लगाके लोगन मन के समस्य ला सुनथें। ओमन कहीन कि लोगन मन सासन के योजना मन ले लाभ उठावत हें अउ राज्य सरकार प्रधानमंत्री नरेंद्र मोदी के गारंटी ला भुइँया म उतारे बर प्रतिबद्ध हे।
मुख्यमंत्री ह कहीन कि राज्य सरकार बिकसित छत्तीसगढ़ के निरमाण के डाहर म लगातार काम करत हे। ओमन कहीन कि लंबा समय तक नक्सलवाद के सेती बस्तर इलाका बिकास ले वंचित रहिस, पर अब नक्सल समस्य के समाधान के डाहर म ऐतिहासिक सफलता मिले हे। ओमन कहीन कि नियद नेल्लानार योजना के धुर्रा ले दूरिहा के गांव मन तक सासन के योजना मन ला पहुंचाय जावत हे। नियद नेल्लानार 2.0 के तहत सवास्थ बिभाग के टीम मन घर-घर जाके सवास्थ जांच करत हें। अब तक 20 लाख ले जादा लोगन मन के जांच करे जा चुके हे अउ 55 लाख लोगन मन के जांच के लछ्य तय करे गे हे। मुख्यमंत्री ह कहीन कि बछर 2047 तक बिकसित छत्तीसगढ़ के निरमाण बर विजन डॉक्यूमेंट तैयार करे गे हे अउ उही के हिसाब ले सरकार योजना बनाके काम करत हे।
उप मुख्यमंत्री अउ लोक निरमाण मंत्री अरुण साव ह कहीन कि कचना इलाका म लगभग 25 ठन बड़ कॉलोनी मन हें अउ ए रेलवे ओवरब्रिज ए सभो कॉलोनी मन ला रायपुर सहर ले अउ अछ्छा ढंग ले जोड़े म अब्बड़ असरदार साबित होही। ओमन कहीन कि कचना के ए ओवरब्रिज सिरिफ एक ठन पुल नोहे, भलुक रायपुर अउ कचना ला जोड़े वाला जीवनरेखा आय। एकर ले न सिरिफ कचना अउ आसपास के रहइया मन ला लाभ मिलही, बल्कि बिलासपुर अउ बलौदाबाजार कोती आये-जाये वाला लोगन मन ला घलो यातायात म बड़े सुबिधा मिलही।
अरुण साव ह कहीन कि प्रदेश म अधोसंरचना बिकास के छेत्र म अभूतपूर्व काम होवत हे। पहिली बार लोक निरमाण बिभाग ला 13 हजार करोड़ रुपिया ले जादा के मंजूरी मिले हे। राज्य सरकार के बने के बाद रिकार्ड संख्या म पुल मन के निरमाण करे गे हे। यातायात ला सुगम बनाये बर अउ पूरा प्रदेश भर म सड़क मन के जार बिछाय बर लगातार काम करे जावत हे। ओमन कहीन कि एक कोती सरकार तेज चले वाला सड़क मन के निरमाण करत हे, त ओही कोती दूसर कोती अइसन गांव मन तक घलो सड़क पहुंचाय के योजना म काम करत हे, जिहां आज तक सड़क के सुबिधा नइ हे।
ए मउका म राज्यसभा सांसद लक्ष्मी वर्मा, विधायक पुरंदर मिश्रा, महापौर मीनल चौबे, छत्तीसगढ़ खाद्य अउ नागरिक आपूर्ति निगम के अध्यक्ष संजय श्रीवास्तव, पार्षद पुष्पा साहू, लोक निरमाण बिभाग के सचिव मुकेश बंसल, कलेक्टर डॉ. गौरव सिंह, नगर निगम आयुक्त संबित मिश्रा, जिला पंचायत सीईओ कुमार बिश्वरंजन संग दूसर अधिकारी अउ जनप्रतिनिधि मन उपस्थित रहिन।
