- महतारी वंदन योजना के तहत महिला मन के खाता में 642 करोड़ रूपिया के रासि अंतरित करिन
रायपुर . सुशासन तिहार के तहत मुख्यमंत्री विष्णु देव साय राजनांदगाँव जिला के मोतीपुर में आयोजित जनसमस्या निवारण सिबिर में सामिल होइन। ए मौका में ओमन जनकल्याण अउ सुशासन कोती सरकार के संकल्प ला मजबूत करत महतारी वंदन योजना के तहत 27वीं कि़स्त के रूप में 68 लाख 52 हजार ले जादा महिला मन के खाता में 642 करोड़ रूपिया ले जादा के रासि डीबीटी (DBT) के माध्यम ले भेजिन। ए अवसर में विधानसभा अध्यक्ष डॉ. रमन सिंह संग अउ कतको जनप्रतिनिधि अउ अधिकारी उपस्थित रहिन।
कारयक्रम के दौरान मुख्यमंत्री विष्णु देव साय ह राजनांदगाँव अउ तीर-तखार के इलाका के विकास बर कतको महत्वपूर्ण घोषणा करिन। एमा राजनांदगाँव-खैरागढ़ राजमार्ग बर 200 करोड़ रूपिया के लागत ले नवा बाईपास निर्माण, टेड़ेसरा-घुमका-बाकल मारग (35 किमी) ला चउड़ा करे बर 75 करोड़ रूपिया अउ धनगाँव-इंदामरा-बांकल मारग बर 30 करोड़ रूपिया के मंजूरी प्रमुख हे। एकर संग ही सहर के वार्ड नंबर 1, 2, 3 अउ 8 में विकास काम बर हर वार्ड ला 25-25 लाख रूपिया के रासि दिय जाही। डोंगरगढ़ में माँ बम्लेश्वरी मंदिर के तीर में 15 कमरा के सर्किट हाउस, जनपद पंचायत राजनांदगाँव के नवा भवन बर 1 करोड़ रूपिया, हॉकी ट्रेनिंग बर नवा खेल मैदान अउ महिला स्व-सहायता समूह ला फिर ले रेडी-टू-ईट बनाय के जिम्मेदारी देय के घलो घोषणा करे गिस।
मुख्यमंत्री श्री साय ह कहिन कि सुशासन तिहार सरकार के “जनता तक सीधा पहुँच” के कार्यशैली के प्रतीक आय। ओमन बताइन कि 1 मई ले सुरू होय सुशासन तिहार 10 जून तक चलही, जेखर माध्यम ले पूरा परदेस भर में मनखे मन के समस्या के तुरते निराकरण करे जावत हे।
मुख्यमंत्री श्री साय ह कहिन कि आम जनता के समस्या मन के उही मेर निराकरण करे जाय अउ एमा कोनो किसम के लापरवाही या ढील देय वाला अधिकारी के खिलाफ कड़ी कार्रवाई करे जाही। ओमन कहिन कि सरकार के योजना के लाभ आखिरी मनखे तक पहुँचाना ही सुशासन तिहार के असल उद्देस हे। ओमन ए घलो बताइन कि ई-डिस्ट्रिक्ट परनाली के माध्यम ले अब 400 ले जादा सेवा ऑनलाइन मिलत हे, जेखर ले लोगन मन ला घर बइठे सुबिधा मिलत हे। संग ही मुख्यमंत्री हेल्पलाइन के तहत जल्दी ही टोल-फ्री नंबर जारी करे जाही, जहाँ मिले सिकायत मन के तय समय में निपटारा करना जरूरी होही।
मुख्यमंत्री ह महतारी वंदन योजना के परभाव ऊपर गोठियावत कहिन कि ए योजना के माध्यम ले महिला मन न केवल अपन परिवार के आर्थिक मजबूती में हाथ बटावत हें, बल्कि स्वरोजगार अउ आत्मनिर्भरता के डाहर घलो आगू बढ़त हें। ओमन पीएम जनमन अउ प्रधानमंत्री आवास योजना के हितग्राही ले गोठ-बात करके योजना के जमीनी हकीकत के जानकारी घलो लीन।
विधानसभा अध्यक्ष डॉ. रमन सिंह ह अपन संबोधन में मुख्यमंत्री के जनता कोती समरपित काम करे के तरीका के बखान करिन अउ कहिन कि ओमन परदेस के दुरिहा-दुरिहा इलाका में पहुँच के जनता ले सीधा गोठियावत हें। ओमन कहिन कि एतका घाम अउ गर्मी के बाद घलो मुख्यमंत्री के ये लगातार दौरा सुशासन कोती ओकर संकल्प ला देखाथे।
ओमन राजनांदगाँव जिला में चलत औद्योगिक विकास के काम के चरचा करत बताइन कि ग्राम पटेवा में लगभग 345 करोड़ रूपिया के लागत ले इलेक्ट्रॉनिक मैन्युफैक्चरिंग क्लस्टर अउ ग्राम बिजेतला में 25 करोड़ रूपिया के लागत ले स्पेस मैन्युफैक्चरिंग क्लस्टर बनाय जावत हे, जेखर ले ए इलाका में रोजगार अउ आर्थिक काम-काज ला बढ़ावा मिलही।
ए मौका में सांसद संतोष पाण्डेय, महापौर मधुसूदन यादव, छत्तीसगढ़ पर्यटन मंडल के अध्यक्ष नीलू शर्मा, श्रम कल्याण मंडल के अध्यक्ष योगेश दत्त मिश्रा, मुख्यमंत्री के प्रमुख सचिव सुबोध सिंह, मुख्यमंत्री के विशेष सचिव रजत बंसल संग अउ दूसर जनप्रतिनिधि, अधिकारी मन अउ भारी संख्या में जनता उपस्थित रहिन।
