स्मार्ट पंजीयन मॉडल से पूरा होवत हे “रिफॉर्म, परफॉर्म अउ ट्रांसफॉर्म” के सपना
मुख्यमंत्री विष्णु देव साय अउ बित्त मंत्री ओ.पी. चौधरी के अगुवाई में पंजीयन व्यवस्था में ऐतिहासिक बदलाव
- सुनील त्रिपाठी
- सहायक संचालक जनसंपर्क
रायपुर, छत्तीसगढ़ में सुशासन अउ मनखे मन के सुबिधा ला केंद्र म रख के प्रशासनिक ब्यवस्था म बड़े सुधार करे जात हे। एही डहार में मुख्यमंत्री विष्णु देव साय अउ बित्त मंत्री ओ.पी. चौधरी के अगुवाई म पंजीयन बिभाग म ऐतिहासिक अउ बदलाव वाले सुधार मन के सुरुआत करे गीस हे। राज सरकार के संसो (उद्देश्य) पंजीयन के बूता ला तुरते, साफ-सुथरा (पारदर्शी), तकनीक अउ कंप्यूटर आधारित अउ मनखे मन बर पूरा सुबिधाजनक बनाना हे।
कभू लंबा-लंबा लाइन, घंटों अगोरा (इंतजार), कागज-पतर के जांच म देरी अउ बार-बार कचहरी-ऑफिस के चक्कर काटे वाला पंजीयन के बूता अब पूरा बदलत दिखात हे। पहिली जिहा एक ठन साधारण रजिस्ट्री ला पूरा करे में 4 से 6 घंटा या कतको बेर 1 से 2 दिन तक लग जात रहिस, ओही अब आधुनिक डिजिटल ब्यवस्था के मदद से ए बूता सिरिफ 15 से 20 मिनट में पूरा होवत हे। एखर से मनखे मन के समे (समय), पइसा अउ मेहनत तीनों के बड़े बचत होवत हे।
राज सरकार ह अवइया एक बछर (साल) के भितरी प्रदेश के जम्मो 119 पंजीयन ऑफिस मन ला स्मार्ट अउ दूनिया भर के सुबिधा मन से सजोए के लक्ष्य रखे हे। पहिली चरण म नवा रायपुर सीबीडी बिल्डिंग, बेबीलॉन टॉवर रायपुर, श्रीराम बिजनेस पार्क सड्डू, कलेक्ट्रेट परिसर रायगढ़, दुर्ग, बिलासपुर, कुनकुरी, अभनपुर अउ तिल्दा समेत 10 बड़े ऑफिस मन ला आधुनिक रूप दिय जात हे।
ए नवा स्मार्ट पंजीयन ऑफिस मन म अब मनखे मन बर बइठे के सुघर लाउंज, एसी (वातानुकूलित) सुबिधा, साफ अउ सँवरे परिसर, फ्री वाई-फाई, मोबाइल चार्जिंग स्टेशन, ठंडा अउ साफ पीए के पानी, आधुनिक संडास (शौचालय), मदद केंद्र (हेल्प डेस्क) अउ प्री-प्रेजेंटेशन काउंटर जइसन कतको आधुनिक सुबिधा मन मिलत हें। एकर से पंजीयन ऑफिस मन अब कोनो आधुनिक सेवा केंद्र जइसन दिखात हें।
रायगढ़ के सुबिधा पाए वाला भाई आशीष अग्रवाल ह अपन खुसी जतावत कहिस कि, पहिली इहां आए ले निराशा लागत रहिस, पर अब माहौल पूरा बदल गे हे। बइठे के सुघर ब्यवस्था हे, एसी लगे हे, ठंडा पानी के सुबिधा हे अउ जम्मो वातावरण अब्बड़ सुग्घर हो गे हे। एकर बर मुख्यमंत्री विष्णु देव साय अउ बित्त मंत्री ओ.पी. चौधरी ला बहुते-बहुत धन्यवाद।
डिजिटल तकनीक के परयोग (उपयोग) से पंजीयन के बूता में साफ-सफाई (पारदर्शिता) अउ बिसवास घलो बाढ़े हे। टोकन सिस्टम लागू होए से भीड़-भड़क्का अउ हरबड़ी कम होय हे, अउ दलाल (बिचौलिया) मन के खेल खतम होए से उपरहा खरचा (अतिरिक्त खर्च) ऊपर रोक लग गे हे। अब मनखे मन ला व्हाट्सएप में संदेसा (नोटिफिकेशन), ऑनलाइन पइसा पटाय (कैशलेस भुगतान), खसरा नंबर से जमीन-जायदाद के ऑनलाइन जानकारी अउ डिजीलॉकर जइसन सुबिधा घलो मिलत हे, जेकर से कागज-पतर तुरते अउ सुरछित (सुरक्षित) मिल जावत हे।
ए जम्मो ब्यवस्था तेजी से बिना कागज (पेपरलेस) अउ डिजिटल मॉडल कोती बढ़त हे, जेकर से सासन म ईमानदारी अउ जबावदेही दूनो मजबूत होवत हे। मुख्यमंत्री विष्णु देव साय के अगुवाई म लागू ए स्मार्ट पंजीयन मॉडल “रिफॉर्म, परफॉर्म अउ ट्रांसफॉर्म” के बिचार (विजन) ला भुइँया (धरातल) में उतारे के एक बड़े उधारण (उदाहरण) बन गे हे।
छत्तीसगढ़ आज जुन्ना, किचकिच अउ फाइल मन के बोझा वाले सिस्टम ला पाछू छोड़त, आधुनिक डिजिटल प्रसासन के डहार में तेजी से आगू बढ़त हे। राज के ए स्मार्ट पंजीयन मॉडल न केवल प्रदेश म सुघर सासन के नवा परिभासा लिखत हे, भलुक देस के दूसर राज मन बर घलो एक रस्ता देखाए वाला उधारण बनत जात हे।
