रायपुर। छत्तीसगढ़ म किसान मन के आर्थिक खुशहाली अऊ खेती-किसानी ला लाभकारी बनाय बर राज्य सरकार ह कई महत्वपूर्ण पहल करत हे। कृषक उन्नति योजना के तहत खरीफ साल 2023 ले 2025 तक प्रदेश के 25 लाख ले जादा किसान मन ला 35 हजार 904 करोड़ 90 लाख रुपिया के भुगतान करे गे हे। कृषि मंत्री रामविचार नेताम अऊ कृषि उत्पादन आयुक्त सिद्धार्थ कोमल सिंह परदेशी ह संयुक्त प्रेस कॉन्फ्रेंस म कृषि विभाग के उपलब्धि अऊ आगू के कार्ययोजना के जानकारी दीन।
कृषि मंत्री रामविचार नेताम ह बताइन कि कृषक उन्नति योजना के तहत किसान मन ला प्रति एकड़ 13,839 रुपिया के समान आदान सहायता दे के प्रावधान हे। वहीं धान के बदला दूसर फसल लेवइया किसान मन ला प्रोत्साहित करे बर सहायता राशि 11 हजार ले बढ़ाके 15 हजार रुपिया प्रति एकड़ कर दे गे हे। ए योजना के तहत अब तक 52 हजार ले जादा किसान मन 28 हजार हेक्टेयर ले जादा रकबा बर पंजीयन कराय हें।
फसल विविधीकरण ला बढ़ावा दे बर दलहन, तिलहन, मक्का, कोदो, कुटकी, रागी अऊ कपास के खेती करेइया किसान मन ला 10 हजार रुपिया प्रति एकड़ सहायता दे के प्रावधान करे गे हे। एखर तहत 4 लाख 26 हजार ले जादा किसान मन 2 लाख 66 हजार हेक्टेयर ले जादा रकबा बर पंजीयन कराय हें। सरकार के उद्देश्य धान ऊपर निर्भरता कम करके किसान मन ला दूसर फसल के खेती करे बर प्रोत्साहित करना हे।
कृषि मंत्री ह बताइन कि प्रधानमंत्री अन्नदाता आय संरक्षण अभियान (पीएम-आशा) के तहत साल 2025-26 म प्रदेश के 29 जिला के 273 केंद्र म दलहन अऊ तिलहन के खरीदी करे गे। ए दौरान अरहर, सोयाबीन, चना, मसूर अऊ सरसों के कुल 3 लाख 72 हजार 39 क्विंटल खरीदी होइस। एखर बदला किसान मन ला 219.08 करोड़ रुपिया के भुगतान करे गे हे।
वहीं श्री अन्न यानी कोदो, कुटकी अऊ रागी के उत्पादन अऊ बिक्री ला बढ़ावा दे बर खरीफ विपणन साल 2026-27 म मार्कफेड के माध्यम ले खरीदी करे जाही। एखर बर 15 दिसंबर 2026 ले 15 फरवरी 2027 तक के समय तय करे गे हे। खरीदे गे मिलेट्स के आपूर्ति आंगनबाड़ी, माध्यमिक स्कूल अऊ अलग-अलग प्रसंस्करण इकाई मन ला घलो करे जाही।
कृषि मंत्री रामविचार नेताम ह कहिन कि राज्य सरकार के लक्ष्य किसान मन ला आर्थिक सुरक्षा, अपन उपज के सही दाम अऊ खेती-किसानी के नवा विकल्प देना हे। फसल विविधीकरण, दलहन-तिलहन के उत्पादन अऊ पारंपरिक मोटा अनाज मन ला बढ़ावा देके प्रदेश के कृषि अर्थव्यवस्था ला मजबूत बनाय के दिशा म लगातार काम करे जात हे।
