- प्रधानमंत्री आवास योजना (ग्रामीण) म डीलर दीदी मॉडल ला मिलिस राष्ट्रीय पहिचान
- आरसेटी अउ कौशल विकास योजना के बढ़िया काम बर घलो होइस प्रशंसा
- राष्ट्रीय ग्रामीण विकास सम्मेलन म सामिल होइन उप मुख्यमंत्री विजय शर्मा
रायपुर, नवा दिल्ली म आयोजित दू दिन के राष्ट्रीय ग्रामीण विकास सम्मेलन म छत्तीसगढ़ के नवा कोसिस ‘मटीरियल बैंक मॉडल’ ला देस भर म बिसेस सराहना मिलिस। केंद्रीय कृषि एवं किसान कल्याण तथा ग्रामीण विकास मंत्री शिवराज सिंह चौहान हा प्रधानमंत्री आवास योजना (ग्रामीण) के तहत बनाए गे ए मॉडल के तारीफ करिन अउ एला ग्रामीण घर बनवाई के काम ला तेजी देवेइया एक बड़े नवाचार बताइन। सम्मेलन म छत्तीसगढ़ कोति ले उप मुख्यमंत्री अउ पंचायत एवं ग्रामीण विकास मंत्री विजय शर्मा हा सामिल होइन।
छत्तीसगढ़ म बने मटीरियल बैंक मॉडल के संचालन हा स्व सहायता समूह के नोनी-बहिनी मन कोति ले “डीलर दीदी” के रूप म करे जात हे। एकर माध्यम ले दुरिहा-ग्रामीण इलाका म प्रधानमंत्री आवास योजना (ग्रामीण) के फायदा पावेइया मन ला घर बनवाई के सामन हा एक ही जगह म मिल जात हे। एकर ले घर बनवाई के काम हा अउ सुघर, तुरत अउ कम खरचा म होवत हे।
ए कोसिस ले स्व सहायता समूह के बहिनी मन के कमाई म बढ़ोत्तरी होय हे अउ 10,000 ले जादा दीदी मन हा ‘लखपति दीदी’ बने के दिसा म आघू बढ़ गे हें। ए मॉडल ला माईलोगन मन के सशक्तिकरण, आजीविका बढ़ाए अउ ग्रामीण घर बनवाई के छेत्र म एक बढ़िया उदाहरण के रूप म देखाए गिस।
केंद्रीय मंत्री शिवराज सिंह चौहान हा कहिन कि छत्तीसगढ़ हा ग्रामीण विकास के छेत्र म नवाचार अउ बढ़िया काम के उदाहरण देखाए हे। ओमन ग्रामीण युवा मन ला कौशल विकास, खुद के रोजगार अउ आजीविका ले जोड़े बर आरसेटी अउ पंडित दीनदयाल उपाध्याय ग्रामीण कौशल योजना के तहत करे जात काम के घलो तारीफ करिन। बता दन कि छत्तीसगढ़ म आरसेटी के माध्यम ले पिछले वित्तीय बरिस म देस म सबले जादा राजमिस्त्री मन ला ट्रेनिंग (प्रशिक्षण) दिए गे हे। ओमन ए कोसिस ला दूसर राज (राज्यों) बर घलो प्रेरणा देवेइया बताइन।
उप मुख्यमंत्री विजय शर्मा हा कहिन कि मुख्यमंत्री विष्णु देव साय के अगवाई म राज्य सरकार हा ग्रामीण विकास, कौशल उन्नयन, स्वरोजगार बढ़ाए अउ गरीब परिवार मन ला बढ़िया सुबिधा दे बर लगातार काम करत हे। ओमन कहिन कि राष्ट्रीय स्तर म मिले ए तारीफ हा प्रदेश के जनकलियान के काम , नवाचार अउ योजना के बढ़िया संचालन के परमान हे, एकर ले राज्य ला ग्रामीण विकास के छेत्र म अउ अब्बड़ बढ़िया काम करे के प्रेरणा मिलही।
