सड़क, स्वास्थ्य, बाल संरक्षण अउ आधारभूत अधोसंरचना ला मिलीस नवा मजबूती
विकास के लाभ आखिरी मानुस तक पहुंचाना सरकार के संकल्प – मुख्यमंत्री विष्णुदेव साय
रायपुर, मुख्यमंत्री विष्णुदेव साय ह अतवार के अपन एक दिन के बेमेतरा प्रवास के बेरा म जिला ला 105 करोड़ 4 लाख 69 हजार रुपिया के विकास बूता के बड़ सौगात दीन। बिसेस बात यह रहीस कि अचानक आय अंधड़, तेज तूफान अउ पानी गिरे के बाद घलो विकास बूता के सुरुआत नई रुकिस अउ मुख्यमंत्री ह जिला पंचायत सभाकक्ष म आयोजित कार्यक्रम के माध्यम ले सबो बूता के लोकार्पण अउ भूमिपूजन संपन्न कराइन।
मुख्यमंत्री विष्णुदेव साय ह अपन उद्बोधन म कहिन कि प्राकृतिक परिस्थिति चाहे कइसनो घलो होय, जनता के विकास अउ जनकल्याण के प्रति सरकार के प्रतिबद्धता अटल हवे। ओमन कहिन कि मौसम के खराब परिस्थिति के कारण कार्यक्रम के जगह म बदलाव करना पड़ीस, भलकुन विकास बूता ला सुरु करे म कोनो किसम के बाधा नई आन दिस। ओमन कहिन कि सरकार के मजबूत इच्छाशक्ति अउ जनहित के प्रति प्रतिबद्ध सोच के परिचायक हवे।
मुख्यमंत्री ह कहिन कि विकास सिरिफ निर्माण बूता तक सीमित नई हे, भलकुन लोगन मन के जिंदगी म सुभीता, बिसवास अउ अवसर के बिस्तार हवे। सड़क, स्वास्थ्य, पेयजल, सिक्षा अउ सामाजिक सुरक्षा ले जुड़े बूता सीधा आम नागरिक मन के जिंदगी के स्तर ला प्रभावित करथे अउ राज्य सरकार के उद्देस्य पक्का करना हे कि योजना के लाभ समाज के आखिरी मानुस तक सहजता ले पहुंचे। ओमन कहिन कि हर गांव, हर किसान, हर माईलोगन अउ हर जरूरतमंद कुटुम तक विकास के अंजोर पहुंचाना सरकार के सबले बड़ प्राथमिकता हावे।
मुख्यमंत्री विष्णुदेव साय ह 78 करोड़ 1 लाख 33 हजार रुपिया के लागत ले बने अइय्या 13 विकास बूता के भूमिपूजन करिन। एमां बेरला-कोदवा-देवरबीजा-कर्मु मारग के दो-लेन मजबूतीकरण, भेड़नी-सल्धा-सिंधोरी मारग, बहिंगा-तिवरैया-सिमगा पहुंच मारग, सोढ़-रेवे-देवरबीजा-अकोला-खाती-सौरी मारग, मुड़पार खुर्द-जमघट पहुंच मारग, मिशन वात्सल्य अंतर्गत बाल संप्रेषण गृह निर्माण, नगर सेना प्रशासकीय भवन निर्माण, गुदेली-कंडरका मारग सहित अलग-अलग गाम मन म सीसी रोड, नाली अउ सामुदायिक अधोसंरचना निर्माण बूता सामिल हावे।
मुख्यमंत्री ह 27 करोड़ 3 लाख 36 हजार रुपिया के लागत ले पूरा होय 5 विकास बूता के लोकार्पण घलो करिन। एमां नवनिर्मित हमर क्लिनिक, बोर खने के बूता अउ अलग-अलग सड़क निर्माण परियोजना मन सामिल हावे।
मुख्यमंत्री ह कहिन कि स्वास्थ्य सुभीता मन के बिस्तार राज्य सरकार के सबले बड़ प्राथमिकता म हे अउ ग्रामीण क्षेत्र मन म गुणवत्तापूर्ण चिकित्सा सेवा उपलब्ध करावे बर लगातार स्वास्थ्य अधोसंरचना ला मजबूत करे जावत हे। ओमन कहिन कि हमर क्लिनिक जइसन सुभीता मन लोगन ला ओकर मेरच कति बेहतर स्वास्थ्य सेवा उपलब्ध करावे म बड़ भूमिका निभाही।
मुख्यमंत्री विष्णुदेव साय ह कहिन कि सड़क मन सिरिफ आवागमन के माध्यम नई हे भलकुन विकास के जीवनरेखा होथे। बेहतर सड़क संपर्क ले सिक्षा, स्वास्थ्य, कृषि, ब्यापार अउ रोजगार के नवा अवसर बाढ़थे। ओमन कहिन कि राज्य सरकार गांव मन ला सहर मन ले अउ किसान मन ला बजार मन ले जोड़े बर आधारभूत अधोसंरचना के बिस्तार ऊपर बिसेस ध्यान देवत हे। बेमेतरा जिला म मंजूर ए परियोजना मन क्षेत्र के सामाजिक अउ आर्थिक विकास ला नवा रद्दा देखिही अउ हजारों लोगन ला सीधा लाभ मिलिही।
मुख्यमंत्री ह अधिकारी मन ला निर्देश करिन कि सबो मंजूर निर्माण बूता तय बेरा-सीमा, गुणवत्ता मानक अउ पारदर्शिता के साथ पूरा करे जाय। ओमन कहिन कि जनता के उम्मेद ऊपर खरा उतरना सरकार के सबले बड़ जिम्मेदारी हावे। प्रधानमंत्री नरेंद्र मोदी के अगवाई म छत्तीसगढ़ म विकास के नवा आयाम तय करे जावत हे अउ राज्य सरकार के संकल्प हे कि विकास के लाभ हर वर्ग तक पहुंचे अउ कोनो घलो क्षेत्र विकास के मुख्यधारा ले वंचित झन रहे। ओमन कहिन कि बेमेतरा जिला म आज जिन विकास बूता के सुरुआत करे गे हावे, वे विकसित बेमेतरा अउ विकसित छत्तीसगढ़ के डाहर म मजबूत आधार साबित होही।
ए मौका म विधानसभा अध्यक्ष डॉ. रमन सिंह, केंद्रीय राज्य मंत्री तोखन साहू, उप मुख्यमंत्री अरुण साव, उप मुख्यमंत्री विजय शर्मा सहित अउ दूसर गणमान्य जनप्रतिनिधि अउ अधिकारी मन उपस्थित रहीन।
