मुख्यमंत्री श्री साय ह पूछिन- “आवास कोन भेजिस?”, मोहन ह कहिस- “मोदी जी ह”
रायपुर,कबीरधाम जिला के ग्राम लोखान में आज एक बहुत भावुक अउ आत्मीय नजारा देखे बर मिलिस। मुख्यमंत्री विष्णुदेव साय ह एक साधारण ग्रामीण के सादा नेवता ल न केवल स्वीकार करिन, बल्कि अपन व्यवहार ले ओला यादगार बना दीन। गांव में मुख्यमंत्री के आए ले जहाँ उत्साह के माहौल रिहिस, वहीं ए घटना ह सरकार अउ जनता के बीच के मया-पिरीत के एक नवा मिसाल पेश करिस।
ग्राम लोखान के रहइय्या मोहन मरावी के नवा पक्का घर के आज ‘गृह प्रवेश’ के कार्यक्रम रिहिस। जैसे ही मोहन ल पता चलिस कि मुख्यमंत्री ह गांव के दौरा में आए हें, ओ ह बिना कतको देरी करे सीधा ओमन करा पहुँच गे अउ अपन घर आए के नेवता दे दीस। एक ग्रामीण के ए मया भरे अरजी ल मुख्यमंत्री ह बड़ सहजता अउ विनम्रता के साथ मान लीन अउ ओकर घर पहुँच के ए मौका ल खास बना दीन।
मुख्यमंत्री जइसने मोहन मरावी के घर पहुँचीन, उहाँ के माहौल पूरा पारिवारिक हो गे। ओमन कोनो औपचारिकता के बिना, पूरा अपनत्व के साथ नरियर फोरिन, दीया बारिन अउ विधि-विधान ले पूजा-पाठ करके गृह प्रवेश के रस्म पूरा कराइन। ए बेरा में परिवार के मनखे मन के चेहरा में जे खुसी अउ गरब दिखत रिहिस, ओ ह ए बात के गवाह रिहिस कि ओमन के पक्का घर के सपना अब पूरा हो चुके हे। गांव के मनखे मन घलो मुख्यमंत्री के ए सादगी के खूब तारीफ करिन।
ए आत्मीय चर्चा के बीच मुख्यमंत्री ह मुसकुरावत मोहन ले पूछिन—“आवास कोन भेजिस?” एखर ऊपर मोहन ह बड़ सुग्घर जवाब दीस—“मोदी जी ह।” ए छोटे-कुन गोठ ह पूरा माहौल ल भावुक कर दीस अउ ए बात ल घलो बताइस कि प्रधानमंत्री नरेंद्र मोदी के ‘गारंटी’ ह कइसन मनखे मन के जिंदगी में भरोसा अउ आस जगावत हे।
मुख्यमंत्री श्री साय ह मोहन मरावी अउ ओकर परिवार ले विस्तार ले बात करिन अउ घर बनाए के तरीका ल जानिन। मोहन ह बताइस कि ए घर ह प्रधानमंत्री आवास योजना ले मिले पइसा अउ ओकर खुद के मेहनत ले तैयार होय हे। पहिली ओकर घर ह कच्चा रिहिस, फेर साल 2024-25 में जइसने आवास पास होइस, ओकर मन में पक्का घर बनाए के हिम्मत जाग गे। साधन कम होय के बाद घलो ओ ह खुद ईंटा बनाइस अउ चार कमरा के एक मजबूत अउ व्यवस्थित घर खड़ा कर दीस, जे ह ओकर मेहनत अउ आत्मनिर्भरता के प्रतीक आय।
मुख्यमंत्री ह घर के मजबूती अउ ओमा दिखत मेहनत के दिल खोल के तारीफ करिन। ओमन कहिन कि— “जब सरकार के योजना ह आखिरी मनखे तक पहुँचथे अउ ओमा मनखे के खुद के मेहनत जुड़थे, तब विकास के असली रूप सामने आथे।” ओमन ए काम ल आत्मनिर्भरता अउ सकारात्मक बदलाव के बढ़िया उदाहरण बताइन अउ कहिन कि अइसन प्रयास ले ही राज्य के विकास के नींव मजबूत होथे।
मोहन मरावी ह ए घलो बताइस कि योजना के पइसा ओला तीन किश्त में मिलिस, जेकर ओ ह सही ढंग ले उपयोग करिस। एखर नतीजा आय कि आज ओ ह अपन परिवार बर एक सुरक्षित अउ सम्मानजनक पक्का घर बना पाइस हे।
मुख्यमंत्री ह पूरा परिवार ल नवा घर के गाड़ा-गाड़ा बधाई दीन अउ ओमन के सुग्घर भविष्य के कामना करिन। ओमन कहिन कि ए घटना ह पूरा गांव बर एक प्रेरणा आय, जे ह ए संदेश देथे कि संकल्प, मेहनत अउ सरकारी योजना के साथ ले हर सपना ह साकार हो सकथे।
