पुर. मुख्यमंत्री विष्णुदेव साय ह आज बलरामपुर जिला मुख्यालय में 4 करोड़ 48 लाख रुपिया के लागत ले बनत ‘नालंदा परिसर’ के निरीक्षण करिन। ओमन उहाँ जाके काम कतका आगू बढ़िस हे अउ कइसन क्वालिटी के काम होत हे, ओकर जायजा लीन। मुख्यमंत्री ह अधिकारी ल कड़ा निर्देश देवत कहिन कि – “निर्माण के काम ल तय समय में अउ बढ़िया क्वालिटी के साथ पूरा करे जाय, काबर कि ए परिसर ह जिला के लइका मन बर पढ़ाई-लिखाई के एक बड़े केंद्र बनही।”
निरीक्षण के बेरा में मुख्यमंत्री श्री साय ह बिल्डिंग में लागत सामान, काम के रफ़्तार अउ उहाँ मिलइय्या सुविधा के बारे में विस्तार ले जानकारी लीन। ओमन अधिकारी ल साफ कह दीन कि – “काम में कोनो भी किसम के लापरवाही बर्दाश्त नहीं करे जाय अउ क्वालिटी के सबो नियम के कड़ाई ले पालन होना चाहिये।” मुख्यमंत्री ह कहिन कि राज्य सरकार के मकसद लइका मन ल पढ़ाई बर बढ़िया माहौल देना आय, ताकि ओमन बड़े-बड़े परीक्षा के तैयारी नीक ढंग ले कर सकं।
मुख्यमंत्री श्री साय ह बताइन कि नालंदा परिसर में:
- आधुनिक ई-लाइब्रेरी के सुविधा होही।
- प्रतियोगी परीक्षा मन बर जरूरी किताब मन मिलही।
- पढ़ाई बर जरूरी सामान अउ पेपर-मैगजीन मन के घलो इंतजाम करे जाही।
ओमन अधिकारी ल कहिन कि काम ल जल्दी पूरा करव ताकि जिला के लइका मन ल एखर फायदा जल्दी मिल सके।
मुख्यमंत्री ह कहिन कि ए नालंदा परिसर ह राज्य सरकार के ओ संकल्प के प्रतीक आय, जेखर तहत युवा मन ल आधुनिक अउ बढ़िया शिक्षा के साधन उपलब्ध कराए जात हे। ओमन भरोसा जताइन कि ए परिसर ह जिला के लइका मन बर ज्ञान अउ अवसर के एक मजबूत केंद्र बनही अउ ओमन के भविष्य सँवारे में बड़े भूमिका निभाही।