संवेदनशील नेतृत्व के असर: मुख्यमंत्री विष्णु देव साय के निर्देश मा बुजुर्ग हितग्राही ला मिलिस तुरंत मदद
- मीडिया मा खबर आते च मुख्यमंत्री ह लीन संज्ञान, प्रशासन ह सुरू करिस काम
- तीन महीना के रुके हुए पेंशन, राशन अऊ योजना के लाभ ला तुरंत करिस तय
- पेंशन अऊ राशन मिल गे, अब सुस्ता लगे हवय… मुख्यमंत्री जी के भारीआभारी हवौं – भीखलु राम ध्रुव
रायपुर . मुख्यमंत्री विष्णु देव साय के संवेदनशील, सजग अऊ जन-जन कोति समर्पित नेतृत्व के एक अऊ बड़े मिसाल आगू आईस हवय, जहाँ एक बुजुर्ग हितग्राही के समस्या ऊपर तुरंत संज्ञान लेवत सरकार ह राहत पहुँचाईस। मुख्यमंत्री के साफ निर्देश मा गरियाबंद जिला के फिंगेश्वर विकासखण्ड के ग्राम पथर्री निवासी भीखलु राम ध्रुव ला जिला प्रशासन के फुर्ती ले बड़े राहत मिलिस।
मीडिया के माध्यम ले एक खबर आगू आईस रहिस कि भीखलु राम ध्रुव ह कतको दिन ले पेंशन अऊ राशन जइसन बुनियादी सुविधा ले वंचित रहिस। ये खबर ला गंभीरता ले लेवत मुख्यमंत्री विष्णु देव साय ह बिना कोनो देरी के तुरंत संज्ञान लीन अऊ जिला प्रशासन ला निर्देश दीन कि संबंधित हितग्राही ला जल्दी ले जल्दी लाभ पहुँचाए जाय। मुख्यमंत्री के निर्देश मिलते च प्रशासनिक अमला ह हरकत मा आइस अऊ प्राथमिकता के आधार मा कार्रवाई सुरू कर दीस।
मुख्यमंत्री के निर्देश के बाद कलेक्टर बीएस उइके ह खुद मामला के जानकारी लीन अऊ विभाग के अधिकारी मन ला तुरंत समस्या दूर करे के हुकुम दीन। जाँच मा ये पता चलिस कि भीखलु राम ध्रुव के ई-केवाईसी (e-KYC) कोनो कारण ले रुके रहिस, जेखर सेती ओला योजना के लाभ नई मिल पावत रहिस। प्रशासन ह तुरंत ई-केवाईसी के काम ला पूरा करवाइस, जेखर ले ओला फिर ले सरकारी योजना के फायदा मिलना सुरू हो गे हवय। प्रशासन के फुर्ती के नतीजा ये रहिस कि भीखलु राम ला तीन महीना के रुके हुए वृद्धावस्था पेंशन एकमुश्त (एक साथ) दे गिस।
ओती खाद्य विभाग ह घलो संवेदनशीलता देखात ओखर घर पहुँच के 1 क्विंटल चाँवल उपलब्ध कराय हवय। अब ओला हर महीना उचित मूल्य के दुकान (कोटा) ले राशन मिलना घलो तय कर दे गे हवय।
मुख्यमंत्री विष्णु देव साय के ये मानवीय अऊ तुरंत मदद ले राहत पाय के बाद भीखलु राम ध्रुव ह मुख्यमंत्री के आभार जताइन। ओ मन कहिन कि— “पेंशन अऊ राशन मिल जाय ले मोर जिनगी मा बड़े राहत आईस हवय। मुख्यमंत्री विष्णु देव साय के ये दया-माया मोर बर बहुत बड़े बात आय। अब मोला भरोसा हे कि सरकार हमर चिंता करथे।”
ये बात ह साफ हे कि मुख्यमंत्री विष्णु देव साय के अगुवाई मा सरकार ह सिरिफ़ योजना बनाय तक सीमित नई हे, बल्कि जमीन मा हर जरूरतमंद तक ओखर लाभ सही समय मा पहुँचे, एखर बर हमेसा सजग अऊ तैयार हे।
