- मुख्यमंत्री विष्णु देव साय ह कलेक्टर मन ला दीन विस्तृत ले निर्देश
- मनखे मन के सिकायत के बखत म निपटारा करे बर जोर
रायपुर. छत्तीसगढ़ में सुशासन ला अऊ जादा मजबूत अऊ असरदार बनाय के खातिर राज्य सरकार ह बछर 2025 के तर्ज म ए बछर घलो “सुशासन तिहार 2026” के आयोजन बड़ पैमाना म करे बर जावत हे। मुख्यमंत्री विष्णु देव साय ह ए संध म परदेस के जम्मो जिला कलेक्टर मन ला चिट्ठी लिख के अभियान ला सफल बनाय बर विस्तृत ले दिशा-निर्देश दीन हें।
मुख्यमंत्री ह अपन चिट्ठी म साफ कहे हें कि मनखे मन के सिकायत के बखत म निपटारा करना ही सुशासन के बुनियाद आय। ओमन कहिन कि आम नागरिक मन ला पारदर्शी, सरल अऊ तुरंते सेवा उपलब्ध कराना राज्य सरकार के सब्बो ले बड़े प्राथमिकता आय। पिछला बछर मनाय गे सुशासन तिहार के बने नतीजा ला देखत हुए ए बछर एला अऊ जादा बड़े रूप म लागू करे जाही।
मुख्यमंत्री ह जम्मो कलेक्टर ला निर्देश दीन हें कि 30 अप्रैल 2026 तक सब्बो जिला म जतका घलो अटके (लंबित) काम हें, ओ मन ला पूरा करे बर एक ठन विशेष अभियान चलाय जाय। एमा भुइँया ले जुड़े मामला जैसे कि नामांतरण, बंटवारा अऊ सीमांकन ला पहिली प्राथमिकता दे जाही।
एकर संग-संग अऊ कतको काम ला झटकुन निपटाए के निर्देश दे गे हे, जइसे कि:
- मनरेगा के अटके मजदूरी भुगतान।
- हितग्राही मूलक योजना के लंबित मामला।
- आय, जाति अऊ निवास प्रमाण पत्र।
- बिजली अऊ ट्रांसफार्मर के समस्या अऊ हैंडपंप सुधार।
मुख्यमंत्री ह ए बात म विशेष जोर दीन हें कि जतका घलो पात्र मनखे हें, ओमन ला उज्ज्वला योजना, राशन कार्ड, आयुष्मान भारत अऊ सामाजिक सुरक्षा पेंशन जइसन योजना के लाभ हर हाल म मिलना चाहिये।
सुशासन तिहार के तहत 1 मई ले 10 जून 2026 तक पूरा परदेस म मनखे मन के समस्या ला दूर करे बर ‘जन समस्या निवारण सिविर’ लगाय जाही। एकर बर मुख्यमंत्री ह ये निर्देश दीन हें गाँव मन म 15 ले 20 ग्राम पंचायत ला मिला के एक ठन समूह (कलस्टर) बनाय जाही अऊ सहर म वार्ड कलस्टर के आधार म सिविर लगाय जाही। ए सिविर म सिर्फ समस्या के समाधान नहीं होही, बल्कि सरकार के योजना के बारे म मनखे मन ला जागरूक घलो करे जाही। जतका घलो पात्र मनखे (हितग्राही) हें, ओमन ला कोसिस करके मौका म ही योजना के लाभ दे के बेवस्था करे जाही। सिविर म जतका घलो अरजी (आवेदन) मिलही, ओकर निपटारा जादा ले जादा एक महिना के भीतर करे बर परही। हर ओ मनखे ला जेकर अरजी जमा होय हे, ओला ओकर काम कहाँ तक पहुँचे हे (आवेदन के स्थिति), ओकर जानकारी देना जरूरी होही। मुख्यमंत्री ह निर्देश दीन हें कि ए अभियान के बखत मंत्री मन, सांसद अऊ विधायक मन, ओकर संग-संग मुख्य सचिव अऊ प्रभारी सचिव मन बखत-बखत म सिविर म जाही। ओमन वहाँ के व्यवस्था के जाँच करहीं अऊ आम जनता ले सरल गोठ-बात (सीधा संवाद) करहीं। एकर ले सासन-प्रसासन के जवाबदेही अऊ पारदर्शिता अऊ जादा मजबूत होही।
ए अभियान के बीच म मुख्यमंत्री विष्णु देव साय ह खुद अलग-अलग जिला के दौरा करहीं अऊ विकास के काम अऊ योजना के काय हाल हे, ओकर अचानक ले (औचक) निरीक्षण करहीं। ओमन हितग्राही ले सीधा बात करके जानकारी लेहीं कि ओमन ला योजना के लाभ मिलत हे कि नहीं।
जिला मुख्यालय मन म अधिकारी मन के संग बैठक लेके सिविर म आय अरजी के निराकरण अऊ योजना के प्रगति के समीक्षा करे जाही। निरीक्षण अऊ बैठक के बाद मुख्यमंत्री ह पत्रकार मन ले गोठियाहीं (प्रेसवार्ता) अऊ समाजिक संगठन अऊ नागरिक मन ले घलो सुझाव लेहीं।
सुशासन तिहार 2026 ला एक ‘जन आंदोलन’ के रूप दे बर जनसंपर्क विभाग अऊ जिला प्रशासन ला बड़े पैमाना म परचार-पसार करे के निर्देश दे गे हे। अलग-अलग संचार माध्यम के जरिया जादा ले जादा मनखे मन ला ए अभियान ले जोड़े के रणनीति बनाय जावत हे।
मुख्यमंत्री ह जम्मो कलेक्टर मन ले ये उमीद जताय हें कि:
- ओमन जतका घलो जरूरी तैयारी हे, ओला झटकुन पूरा कर लें।
- ए अभियान ला ‘जनभागीदारी’ के एक ठन मजबूत जरिया बनायें।
- ताकि परदेस के हर एक नागरिक तक सरकार के योजना मन के लाभ सही तरीका ले पहुँच सके।
