- सफलता के कोनो शॉर्टकट नई होवय; अनुशासन, मिहनत अउ सुग्घर दिनचर्या ही असली कुंजी ए – मुख्यमंत्री श्री साय
- मुख्यमंत्री निवास म टॉपर्स ले गोठ-बात: संघरस, सिच्छा, सुवास्थ्य अउ सपना ऊपर होईस खुल के चरचा
- पढ़ई के संग सुवास्थ्य, योग अउ अनुशासित जीवन घलो ओतके जरूरी हे – मुख्यमंत्री विष्णुदेव साय
रायपुर, मुख्यमंत्री विष्णुदेव साय ह आज मुख्यमंत्री निवास, सिविल लाइन्स रायपुर म कक्षा 10वीं अउ 12वीं के प्रावीण्य सूची (मेरिट लिस्ट) म जगह बनाय वाले होनहार लइका मन ले मयारू भेंट करिन अउ ओमन ला बधाई दीन। मुख्यमंत्री श्री साय ह लइका मन के संग एकदम सहज अउ प्रेरणादायी ढंग ले गोठ-बात करत ओकर मन के सपना, पढ़ई के तरीका, सफलता के अनुभव अउ आगू के योजना के बारे म विस्तार ले चरचा करिन। ए बखत मुख्यमंत्री निवास के माहौल उत्साह, प्रेरणा अउ मया ले भर गे रहिस।
मुख्यमंत्री विष्णुदेव साय ह लइका मन ला संबोधित करत कहिन कि जिनगी म सफलता पाय बर लगातार मिहनत, अनुशासन अउ सकारात्मक सोच बहुते जरूरी हे। ओमन कहिन कि पढ़ई ह सिरिप परीक्छा म बने नंबर लाय के जरिया नोहे, बल्कि जिनगी ला रद्दा देखाय वाली सबले बड़े सकती ए। सिच्छा ह ही मनखे अउ समाज के विकास के मूल अधार ए।
मुख्यमंत्री श्री साय ह लइका मन ले एक-एक करके परिचय लीन अउ ओमन ले पूछिन कि ओमन आगू चल के का बनना चाहथें। ए दौरान लइका मन ह डॉक्टर, इंजीनियर, आईएएस, आईपीएस अउ दूसर छेत्र म जाके देस सेवा करे के अपन ईच्छा जताइन। मुख्यमंत्री ह लइका मन के सुग्घर सपना के सराहना करत कहिन कि जेकर सपना बड़े होथे, उही मन जिनगी म बड़े मुकाम हासिल करथें।
गोठ-बात के बखत मुख्यमंत्री ह लइका मन ले ओकर पढ़ई के दिनचर्या अउ सफलता के अनुभव घलो साझा करवाइन। ओमन कहिन कि नियम ले दिनचर्या, समय के सही प्रबंधन अउ लगातार अभ्यास सफलता के सबले जरूरी कुंजी ए।
मुख्यमंत्री ह कहिन कि ओमन खुद घलो अपन जिनगी म अनुशासित दिनचर्या के पालन करथें। ओमन लइका मन ला सलाह दीन कि पढ़ई के संग-संग सुवास्थ्य के घलो विसेस धियान राखें, काबर कि सुग्घर सरीर म ही सुग्घर के बास होथे।
मुख्यमंत्री श्री साय ह लइका मन ला योग, नियम ले कसरत अउ संतुलित जीवन शैली अपनाय के प्रेरणा देवत कहिन कि योग ह मनखे ला मानसिक अउ शारीरिक रूप ले मजबूत बनाथे। ओमन कहिन कि ओमन खुद रोज दिन योग करथें अउ अतेक व्यस्त दिनचर्या के बाद घलो सुवास्थ्य बर समय निकालथें।
लइका मन के सवाल के जवाब देवत मुख्यमंत्री श्री साय ह अपन संघरस भरे जिनगी के जात्रा ला घलो साझा करिन। ओमन बताइन कि बचपन म ही ओकर ददा के देहांत हो गे रहिस, जेकर बाद परिवार के जिम्मेदारी कम उमर म ही ओकर कांधा म आ गे। खेती-किसानी, छोटे भाई मन के पढ़ई अउ परिवार के देख-रेख के बीच ओमन जिनगी के संघरस ला देखिन।
मुख्यमंत्री ह कहिन कि ओमन कभू ये नई सोचे रहिन कि ओमन राजनीति म एतेक बड़े पद तक पहुंचही, फेर जो भी जिम्मेदारी मिलिस, ओला पूरा निस्ठा अउ ईमानदारी ले निभात गीन। मुख्यमंत्री श्री साय ह कहिन कि जिनगी म परिस्थिति चाहे कतेक भी कठिन काबर न होवय, यदि मनखे मिहनत अउ समरपन के संग आगू बढ़थे, त सफलता जरूर मिलथे। ओमन लइका मन ला उत्साहित करत कहिन कि संघरस ही मनखे ला मजबूत बनाथे अउ चुनौती ही जिनगी के सबले बड़े गुरु होथे।
मुख्यमंत्री ह लइका मन ला बताइन कि सार्वजनिक जिनगी म समय के प्रबंधन अउ जिम्मेदारी के महत्व बहुत जादा होथे। ओमन कहिन कि मुख्यमंत्री के रूप म ओमन ला परदेस के जम्मो विभाग अउ जनता के समस्या ऊपर लगातार धियान देना परथे। ‘सुशासन तिहार’ के माध्यम ले ओमन लगातार गांव-गांव जाके मनखे मन ले गोठ-बात करत हें अउ योजना के सही स्थिति के जानकारी लेवत हें। ओमन कहिन कि जनता के बीच रहे ले ही उर्जा अउ प्रेरणा मिलथे।
मुख्यमंत्री श्री साय ह कहिन कि यदि ओमन राजनीति म नई आते, त एक अच्छे किसान बनके खेती अउ किसानी म नवा प्रयोग (नवाचार) के छेत्र म काम करते। ओमन कहिन कि आज खेती के छेत्र म घलो बहुत संभावना हे अउ पढ़े-लिखे जवान मन आधुनिक खेती, पशुपालन, मछरी पालन अउ खेती ले जुड़े दूसर काम के माध्यम ले रोजगार अउ आत्मनिर्भरता के नवा मिसाल पेस करत हें।
मुख्यमंत्री श्री साय ह लइका मन ला अपन दाई-ददा अउ गुरु मन के सम्मान करे के सीख देवत कहिन कि जिनगी के पहिली सिच्छा परिवार अउ गुरु ले ही मिलथे। ओमन कहिन कि दाई-ददा अउ शिक्षक ही लइका मन के सफलता के सबले बड़े अधार होथें।
मुख्यमंत्री ह लइका मन ला उज्ज्वल भविस्स के बधाई देवत कहिन कि छत्तीसगढ़ के ये होनहार लइका मन आवे वाला समय म परदेस अउ देस के नाम उज्जर करहीं। ओमन लइका मन ले कहिन कि ओमन सिरिप अपन सफलता तक सीमित झन रहंय, बल्कि समाज अउ देस के निर्माण म घलो अपन बड़े भूमिका निभायं।
मुख्यमंत्री विष्णुदेव साय ह गोठ-बात के दौरान कहिन कि आज के छत्तीसगढ़ सिच्छा के छेत्र म तेजी ले आगू बढ़त हे। ओमन कहिन कि एक समय अइसन रहिस जब गांव म प्राथमिक सिच्छा तक के सुविधा कम रहिस, फेर आज परदेस के दुरिहा इलाका तक स्कूल, हाई स्कूल अउ हायर सेकेंडरी स्कूल के विस्तार हो चुके हे। मुख्यमंत्री ह कहिन कि अभी के समय म छत्तीसगढ़ म बड़े-बड़े सिच्छा संस्थान मौजूद हें, जेकर ले परदेस के लइका मन ला आगू बढ़े के नवा मौका मिलत हे।
सिच्छा मंत्री गजेंद्र यादव ह ए मौका म मेरिट लिस्ट म आवे वाले जम्मो लइका मन ला बधाई दीन अउ कहिन कि ये मेधावी लइका मन छत्तीसगढ़ के उज्जर भविस्स के चिनहा अंय। ओमन कहिन कि मुख्यमंत्री विष्णुदेव साय के अगुवाई म राज्य सरकार सिच्छा के गुनवत्ता, आधुनिक संसाधन अउ लइका मन के चहुंमुखी विकास बर लगातार काम करत हे। ओमन लइका मन ला भरोसा के संग अपन लक्छ (Target) कोती आगू बढ़े अउ देस-परदेस के नाम रोशन करे बर प्रेरित करिन।
मुख्यमंत्री निवास पहुंच के मेधावी लइका मन म भारी उत्साह देखिस। लइका मन ह मुख्यमंत्री आवास के कोना-कोना ला देखिन, ओकर काम करे के तरीका ला समझिन अउ सासन-प्रसासन ले जुड़े बहुत अकन जरूरी जानकारी लीन। ए दौरान लइका मन ह आवास म लगे आमा ला घलो तोरिन अउ मयारू माहौल म आनंद के बेरा बिताइन। मुख्यमंत्री विष्णुदेव साय ह लइका मन ले अतेक सहज अउ अपनपन ले गोठ करिन कि लइका मन गदगद हो गे रहिन। लइका मन ह मुख्यमंत्री निवास के ये अनुभव ला अपन जिनगी के यादगार पल बताइन।
ये घलो जाने के लायक हे कि मेरिट लिस्ट म आवे वाले ए मेधावी लइका मन ला सरकार कोती ले एक दिन पहिली नवा रायपुर के शहीद वीर नारायण सिंह अंतरराष्ट्रीय क्रिकेट स्टेडियम म IPL क्रिकेट मैच देखे के मौका घलो दे गय रहिस। लइका मन ह ए यादगार अनुभव बर मुख्यमंत्री विष्णुदेव साय के आभार जताइन।