मुख्यमंत्री श्री साय के अगुवाई म मनखे-मनखे तक पहुँचत हे सुशासन
मंत्री ह शिविर म आम लोगन के समस्या सुनिन
अधिकारी मन ल आवेदन के तुरत निराकरण करे के निर्देश
रायपुर. छत्तीसगढ़ म सुशासन के सपना ल जमीन स्तर म पूरा करे बर आज एक मई ले ‘सुशासन तिहार 2026’ के परदेस भर म सुभारंभ होइस। मुख्यमंत्री विष्णु देव साय के अगुवाई म 01 मई ले 10 जून तक चलने वाला ए अभियान ह सरकार अउ जनता के बीच के दूरी ल खत्म करके साफ-सुथरा, झटपट अउ संवेदनसील प्रसासन तय करे के एक बड़े पहल आय।
अभियान के पहिली दिन परदेस के अलग-अलग जिला म जनसमस्या निवारण शिविर लगाय गिस, जिहां मंत्री, जनप्रतिनिधि अउ प्रसासनिक अधिकारी खुद मौजूद रहिके आम लोगन के समस्या ल सुनिन। ये पहल ह सही म राज के आखिरी मनखे तक सरकारी योजना के फायदा पहुँचाय बर छत्तीसगढ़ सरकार के संकल्प ल पूरा करे के एक मजबूत माध्यम आय।
बलौदाबाजार-भाटापारा जिला के ग्राम रिसदा म लगाय शिविर म भारी भीड़ उमड़िस। इहां मिले 573 आवेदन म ले लगभग 47 प्रतिशत के निराकरण मौका म ही कर दिय गिस। राजस्व मंत्री टंक राम वर्मा ह अधिकारी ल निर्देश दिन कि हर एक आवेदन के तय समय म निराकरण करे जाय अउ आवेदन देवइया ले ओखर संतुष्टि के फीडबैक घलो लिय जाय।
कोरबा जिला के कटघोरा विकासखंड के ग्राम धनरास म आयोजित शिविर म 332 आवेदन मिलिन, जेमा ले 103 के तुरत समाधान कर दिय गिस। वाणिज्य, उद्योग अउ सरम (श्रम) मंत्री लखनलाल देवांगन ह कहिन कि ये अभियान ह सरकार के योजना ल आखिरी मनखे तक पहुँचाय के एक सशक्त जरिया बनत हे।
एही कड़ी म रायपुर जिला के अभनपुर विकासखंड के ग्राम कठिया म लगाय शिविर म मंत्री गुरु खुशवंत साहेब के मौजूदगी म कतकोन हितग्राही ल सरकार के अलग-अलग योजना के फायदा दिय गिस। महतारी ल मनरेगा के जॉब कार्ड बांटे गिस। दिव्यांग हितग्राही योगेश यादव ल मोटराइज्ड ट्राईसाइकिल दिय गिस। शिविर म हितग्राही के चेहरा म भारी खुशी देखत बनत रहिस।
शिविर म अलग-अलग विभाग कोति ले ‘वन-स्टॉप समाधान केंद्र’ के रूप म स्टॉल लगाय गिस, जिहां आम लोगन ल आयुष्मान कार्ड, राशन कार्ड, केसीसी लोन, उज्ज्वला योजना, खेती के समान, मछरी पालन के समान संग दूसर योजना के फायदा मौका म ही दिय गिस। स्वास्थ्य विभाग कोति ले डिजिटल एक्स-रे जइसन सुविधा मिलय ले गांव वाले ल तुरत राहत मिलिस।
सुशासन तिहार के जरिया सिरिफ सिकायत के निराकरण नई करे जावत हे, बल्कि आम लोगन ल सरकार के योजना बर जागरूक करके ओ मन ल आत्मनिर्भर बनाय के घलो कोशिश करे जावत हे। मुख्यमंत्री विष्णु देव साय खुद ए अभियान के लगातार मॉनिटरिंग करत हें अउ अचानक निरीक्षण करके काम-काज के समीक्षा घलो करहीं।