- फाइलेरिया अउ मलेरिया नियंत्रण म राज्य मॉडल के देस भर म सराहना
- फाइलेरिया उन्मूलन म BIHAN मॉडल अउ ‘मलेरिया मुक्त बस्तर’ पहल ल नवाचार अउ जनभागीदारी बर सराहना
रायपुर. जनस्वास्थ्य के क्षेत्र म छत्तीसगढ़ ह एक अउ बड़े उपलब्धि हासिल करत राष्ट्रीय स्तर म अपन मजबूत उपस्थिति दर्ज कराए हे। 30 अप्रैल अउ 01 मई 2026 ल चंडीगढ़ म आयोजित “National Summit on Innovation and Inclusivity – Best Practices Shaping India’s Future” म राज्य ल फाइलेरिया अउ मलेरिया उन्मूलन बर अपनाए गे नवाचारी पहल म सम्मानित करे गिस। ए सम्मान ह न केवल राज्य के स्वास्थ्य रणनीति के असर ल बताथे, भलकुन सामुदायिक भागीदारी ले बने मॉडल के सफलता के घलो परमान ए।
BIHAN मॉडल ह बदलीस तस्वीर, महिला समूह बनीन बदलाव के केंद्र
फाइलेरिया उन्मूलन अभियान म BIHAN (स्टेट रूरल लाइवलीहुड मिशन) ले जुड़े महिला स्व-सहायता समूह के सक्रिय भागीदारी ल राष्ट्रीय स्तर म सराहे गिस। Mission Steering Group–Human Resource (MSG–HR) के तहत ए मॉडल ल देस के सबले बने नवाचारी अउ समावेशी पहल के रूप म मान्यता मिलिस, जेकर म PCI India के तकनीकी सहयोग घलो महत्वपूर्ण रिहिस।
मास ड्रग एडमिनिस्ट्रेशन (MDA) अभियान के बखत महिला मन ह घर-घर पहुँच के न केवल दवा खवाना पक्का करिन, भलकुन समाज म फैले भरम ल घलो दूर करिन। सामुदायिक बैठक अउ जागरूकता के काम ले लोगन मन म भरोसा जगाए गिस। एकर नतीजा ए रिहिस कि दवा खाय ले मना करे वाले लगभग 74% लोगन मन ल राजी करे गिस- जे ए मॉडल के सबले बड़े सफलता के रूप म आगू आईस।
‘मलेरिया मुक्त बस्तर’ ह दुरिहा इलाका म देखाइस असर
सम्मेलन म ‘मलेरिया मुक्त बस्तर’ अभियान ल घलो एक प्रभावी अउ परिणाम देवे वाला पहल के रूप म बिसेस सराहना मिलिस। बस्तर के दुरिहा अउ आदिवासी अंचल म चले ए अभियान के तहत घर-घर स्क्रीनिंग, रैपिड डायग्नोस्टिक टेस्ट (RDT) ले समय म जाँच, तुरंते इलाज अउ Day-7 व Day-14 फॉलो-अप के माध्यम ले पूरा इलाज पक्का करे गिस।
ए अभियान के खास उपलब्धि बिना लच्छन वाले (Asymptomatic) मरीज मन के पहिचान रिहिस, जेकर ले संक्रमण के सांकल ल तोड़े म बड़े मदद मिलिस। एकर बने नतीजा घलो साफ दिखत हे- राज्य के API बछर 2019 म 1.97 ले घट के 2025 म 0.90 हो गे हे, जबकि बस्तर संभाग म ए ह 13.12 ले घट के 6.98 तक पहुँच गे हे।
दूसर राज्य बर प्रेरक मॉडल-
राष्ट्रीय मंच म आए बिसेसज्ञ अउ नीति-निर्माता ह छत्तीसगढ़ के BIHAN आधारित सामुदायिक मॉडल अउ ‘मलेरिया मुक्त बस्तर’ अभियान ल दूसर राज्य मन बर अनुकरणीय बताइन। कम खरचा म जादा असर देवे वाली ए पहल ह ए साबित करथे कि जनभागीदारी अउ स्थानीय रणनीति के माध्यम ले कठिन स्वास्थ्य चुनौती के समाधान संभव हे।
राज्य सरकार ह संदेस दीन हें कि आगू घलो समुदाय आधारित, नवाचार अउ छेत्र के हिसाब ले रणनीति ल प्राथमिकता देवत जनस्वास्थ्य सेवा ल अउ जादा मजबूत करे जाही।
