रायपुर. मुख्यमंत्री विष्णु देव साय ह आज राजधानी रायपुर म बने मुख्यमंत्री निवास म रखे गे ‘डिजिटल डेमोक्रेसी डायलॉग’ म जम्मो देस ले आए कंटेंट क्रिएटर्स के सुवागत अउ अभिनंदन करिन। ओमन कहिन कि छत्तीसगढ़ ह सिरिफ एक ठन राज्य नई हे, बल्कि ए ह आस्था, संस्कृति अउ परकृति के संगम आय।
मुख्यमंत्री श्री साय ह कहिन कि ए धरती ह भगवान श्रीराम के ननिहाल अउ माता कौशल्या के मायके के रूप म जाने जाथे। वनवास के 14 बछर म ले जादा बखत भगवान श्रीराम ह इहें बिताइन, जेकर सबूत आज घलो परदेस के कतको जगह म मिलथे। ओमन माता शबरी के भक्ति, दंडकारण्य अउ अबूझमाड़ जइसन ऐतिहासिक-आध्यात्मिक जगह के जिकर करत हुए छत्तीसगढ़ के गौरवशाली परंपरा ला बताइन।
ओमन संत गुरु घासीदास बाबा जी के “मनखे-मनखे एक समान” के संदेस ला याद करत कहिन कि सत्य अउ अहिंसा के ए परंपरा आज घलो परदेस के अंतस म बसे हे।
मुख्यमंत्री श्री साय ह कहिन कि कभू नक्सलवाद ले प्रभावित रहय छत्तीसगढ़ ह आज तेजी ले बदलत हे। प्रधानमंत्री श्री नरेंद्र मोदी के मजबूत इच्छाशक्ति, केंद्रीय गृह मंत्री अमित शाह के संकल्प अउ सुरक्षा बल के बड़े साहस के फल हे कि परदेस अब नक्सलवाद ले मुक्त होय डाहर निर्णायक सफलता पा चुके हे। ओमन बताइन कि पहिली जिहां परदेस के एक बड़े हिस्सा म नक्सलवाद के साया रहिस, अब उहां विकास के धारा ह गांव-गांव तक पहुंचत हे।
मुख्यमंत्री ह बस्तर संभाग ला परकृतिक सुग्घरई अउ पर्यटन के भंडार बतावत कहिन कि इहां के जलप्रपात, घन जंगल, संस्कृति अउ जनजातीय जिनगी ह देस-बिदेस के पर्यटक ला अपन डाहर खींचथे। ओमन बताइन कि यूनेस्को कोति ले बस्तर के धुड़मारास गांव ला दुनिया के 20 सबसे सुग्घर पर्यटन स्थल न म सामिल करना परदेस बर बड़े गरब के बात आय।
ओमन कंटेंट क्रिएटर्स मन ले गोहरावत कहिन कि ओमन अपन पहुंच के उपयोग करत हुए बस्तर अउ छत्तीसगढ़ के सुग्घर अउ सकारात्मक चेहरा ला देस-दुनिया तक पहुंचाएं।
मुख्यमंत्री श्री साय ह उदाहरण देवत बताइन कि बस्तर के दिव्यांग लइका मड्डा राम के वीडियो वायरल होय म क्रिकेटर सचिन तेंदुलकर ह ओला क्रिकेट किट भेजे रहिस—ए ह सोशल मीडिया के ताकत के बड़े सबूत आय।
परदेस म विकास के काम के चर्चा करत मुख्यमंत्री श्री साय ह बताइन कि नवा औद्योगिक नीति के खाले पिछला दू बछर म 8 लाख करोड़ रुपये ले जादा के निवेश प्रस्ताव मिले हें। एकर संग ही, “छत्तीसगढ़ विजन 2047” के माध्यम ले राज्य ला विकसित बनाए डाहर काम करे जावत हे।
नक्सल प्रभावित इलाका के विकास बर चलत योजना के जिकर करत ओमन कहिन कि “नियद नेल्ला नार योजना” के माध्यम ले सड़क, बिजली, पानी, राशन, वनाधिकार पट्टा अउ मोबाइल-इंटरनेट जइसन जरूरी सुविधा ला दुरिहा-दुरिहा के गांव तक पहुंचाए गे हे। बस्तर ओलंपिक अउ सांस्कृतिक कार्यक्रम के जरिए युवा मन ला मुख्यधारा ले जोड़े जावत हे।
डिजिटल जुग के बखत ला बतावत हुए मुख्यमंत्री श्री साय ह कहिन कि प्रधानमंत्री के डिजिटल इंडिया विजन के असर आज गांव-गांव म दिखत हे, जिहां आम मनखे घलो डिजिटल भुगतान (लेन-देन) करत हें। ओमन क्रिएटर्स मन ले ए बदलाव ला अउ आघू बढ़ाए के गोहराव करिन।
कार्यक्रम ला संबोधित करत हुए रामभाऊ म्हालगी प्रबोधिनी के उपाध्यक्ष विनय सहस्त्रबुद्धे ह कहिन कि नक्सलवाद के साया ले बाहिर निकलके उभरत नवा छत्तीसगढ़ आज देस के आघू एक सकारात्मक अउ प्रेरणा देय वाला उदाहरण बनके खड़ा होवत हे। ओमन कहिन कि जउन इलाका ला कभू सिरिफ लड़ाई अउ चुनौती के रूप म देखे जावत रहिस, उहें आज विकास, सांति अउ संभावना के नवा कहानी लिखे जावत हे।
ओमन कंटेंट क्रिएटर्स ले अपील करिन कि ओमन कउनो घलो पुराना सोच ला छोड़के छत्तीसगढ़ ला समझंय अउ इहां होवत असली बदलाव, मनखे मन के जिनगी म आए सुग्घर परिवर्तन, सांस्कृतिक संपन्नता अउ विकास के नवा रफतार ला अपन मंच के माध्यम ले देस-दुनिया तक पहुंचाएं। ओमन कहिन कि आज डिजिटल माध्यम ह सिरिफ अपन बात रखे के साधन नई हे, बल्कि ए ह सोच बनाए के सबसे बड़े ताकत बन चुके हे, अइसन म क्रिएटर्स मन के जिम्मेदारी अउ बाढ़ जाथे कि ओमन सच अउ सकारात्मकता पर आधारित कंटेंट बनाके समाज म नवा सोच अउ भरोसा जगाएं।
ए मौका म विधायक किरण सिंह देव, मुख्यमंत्री के सलाहकार आर. कृष्णा दास, डॉ. गुरु पासवान, प्रबल प्रताप सिंह जूदेव अउ जनसंपर्क आयुक्त रजत बंसल के संग आन गणमान्य मन उपस्थित रहिन।