सियान मन बर डे-केयर सुविधा ले लबालब केंद्र : योग, स्वास्थ्य, मनोरंजन अउ कौशल विकास के मिलही एके छत के खाले सुविधा
रायपुर. मुख्यमंत्री विष्णु देव साय ह आज जशपुर म सियान मन बर बनाए गे अत्याधुनिक डे-केयर केंद्र ‘सियान गुड़ी’ के लोकार्पण करिन। ए मौका म ओमन ह सियान मन के संग कैरम खेलके ओमन के उत्साह बढ़ाईन अउ गोठ-बात करिन। मुख्यमंत्री ला अपन बीच म पाके सियान मन गदगद हो गे अउ राज्य सरकार कोति ले बनाए गे ‘सियान गुड़ी’ बर आभार जताइन।
मुख्यमंत्री विष्णु देव साय ह ए बेरा म सियान मन ला फूड बास्केट (अहार टोकरी) बाँटिन अउ धार्मिक किताब, शॉल अउ श्रीफल भेंट करके ओमन के सम्मान करिन। ओमन समाज म सियान मन के सम्मान अउ ओमन के देख-रेख बर राज्य सरकार के संकल्प ला दोहरावत कहिन कि छत्तीसगढ़ अपन समृद्ध सांस्कृतिक परंपरा अउ पारिवारिक मूल्य बर जाने जाथे, फेर आज के बखत म समाज ह तेजी ले बदलत हे। एकेला परिवार के बाढ़त चलन, रोजगार बर लइका मन के पलायन अउ भाग-दौड़ के जिनगी के सेती कतको सियान मन दिन के समय एकेलापन अउ उपेक्षा के सामना करत हें। ओमन कहिन कि ए एकेलापन सिरिफ भावनात्मक नई हे, बल्कि मानसिक अउ शारीरिक स्वास्थ्य म घलो खराब असर डारथे।
मुख्यमंत्री श्री साय ह कहिन कि ए सब चुनौती के समाधान बर ‘डे-केयर सेंटर – सियान गुड़ी’ के परिकल्पना करे गे हे। ए भवन ह सियान मन बर सम्मान, मया-पिरीत अउ सक्रियता के एक बड़ केंद्र बनही, जिहां ओमन सुरक्षित माहौल म दिन बिताके नवा ऊर्जा अउ उत्साह पा सकहीं। मुख्यमंत्री ह केंद्र के निरीक्षण करत हुए इहां के सुविधा के सराहना करिन अउ एला सियान मन बर एक आदर्श पहल बताइन।
उपमुख्यमंत्री विजय शर्मा ह कहिन कि ‘सियान गुड़ी’ के माध्यम ले राज्य सरकार ह सियान मन के जिनगी ला अउ जादा सम्मानजनक, सक्रिय अउ खुशहाल बनाए के डाहर म एक बड़े कदम उठाए हे, जेकर ले सामाजिक समरसता ह मजबूत होही अउ पारिवारिक मूल्य मन ला घलो नवा ऊर्जा मिलही।
ये बात बताय के लउक हे कि जशपुर के रणजीता स्टेडियम के पाछू भागलपुर रोड म बने ये ‘सियान गुड़ी’ केंद्र ह सियान मन बर एक ठन बड़ डे-केयर यूनिट के रूप म तइयार करे गे हे, जेकर मुख्य उदेस्य ओमन ला एके जगह म कतको किसम के सुविधा मन ला देना हे। इहां योग, प्राणायाम, मनोरंजन, सांस्कृतिक अउ सामुदायिक काम-काज, डिजिटल अउ पैसा-कउड़ी के जानकारी के संग कौशल विकास के ट्रेनिंग घलो दे जाय के सुविधा हे। एकर संग-संग प्राथमिक स्वास्थ्य जांच, जरूरी दवाई मन के व्यवस्था, टेली कंसल्टेशन (फोन म डाक्टर ले सलाह), स्वास्थ्य बर जागरूकता, फिजियोथैरेपी अउ कसरत के घलो इंतजाम करे गे हे।
एकर अलावा केंद्र म सियान मन ला कानूनी अउ पारिवारिक सलाह (परामर्श) घलो दिये जाही। अगर कोनो मेर ओमन के उपेक्षा या दुर्व्यवहार होथे, त नेशनल हेल्पलाइन नंबर 14567 अउ राज्य स्तरीय सियान हेल्पलाइन नंबर 155326 के माध्यम ले तुरंते मदद पहुंचाई जाही। सुविधा के नजर ले ‘सियान गुड़ी’ ला एकदम आधुनिक रूप दिये गे हे, जिहां बिना कोनो रूकावट के घूमे-फिरे के जगह, व्हील चेयर के सुविधा, बइठे बर आरामदायक व्यवस्था, महिला अउ मनखे मन बर अलग-अलग अउ दिव्यांग मन बर सुग्घर संडास-बदना, गोठ-बात अउ कार्यक्रम बर बड़े हॉल, पुस्तकालय अउ सांत रीडिंग कॉर्नर तइयार हे। एकर संग म टीवी, रेडियो, सीसीटीवी, बायोमैट्रिक हाजिरी, स्वास्थ्य जांच डेस्क, हर महीना डाक्टरी सलाह, फिजियोथैरेपी कोना अउ टेलीमेडिसिन के घलो सुविधा दी जावत हे।
ए केंद्र म हर दिन 6 ले 8 घंटा तक सियान मन बर योग, कसरत, चहा-नास्ता, जेवन, मनोरंजन, जीवन कौशल अउ फेर ले कौशल विकास के ट्रेनिंग, स्वास्थ्य जांच, सांस्कृतिक कार्यक्रम, गोठ-बात अउ कानूनी अउ सामाजिक जागरूकता ले जुड़े कतको किसम के कार्यक्रम चलाय जाही।
ए मौका म छत्तीसगढ़ भवन अउ आन सन्निर्माण कर्मकार मंडल के अध्यक्ष रामप्रताप सिंह, पत्थलगांव विधायक गोमती साय, जशपुर विधायक रायमुनी भगत, नगर पालिका उपाध्यक्ष यश प्रताप सिंह जूदेव, प्रबल प्रताप सिंह जूदेव, सरगुजा संभाग के कमिश्नर नरेंद्र दुग्गा, पुलिस कमिश्नर दीपक कुमार झा, कलेक्टर रोहित व्यास, वरिष्ठ पुलिस अधीक्षक लाल उमेंद सिंह के संग अउ कतको जनप्रतिनिधि अउ सियान मन उपस्थित रहिन।
