- आस्था स्पेशल ट्रेन ले बिलासपुर संभाग के 850 श्रद्धालु मन सुरू करिन यात्रा
- केंद्रीय राज्य मंत्री तोखन साहू ह देखाइन हरी झंडी
बिलासपुर. आज बिलासपुर रेलवे स्टेशन ले श्री रामलला दर्शन योजना के तहत आस्था स्पेशल ट्रेन ह बिलासपुर संभाग के 850 सरधालु मन ला लेके अयोध्या धाम बर रवाना होइस। ये मउका मा केंद्रीय राज्य मंत्री तोखन साहू ह श्रद्धालु मन ले भरे विशेष ट्रेन ला हरी झंडी दिखाके रवाना करिन। ये बखत मा जिला पंचायत अध्यक्ष राजेश सूर्यवंशी, सीईओ जिला पंचायत संदीप अग्रवाल, मंडल रेल प्रबंधक राकेश रंजन, अउ वरिष्ठ मंडल वाणिज्य प्रबंधक अनुराग सिंह घलो उपस्थित रीहिन।
केंद्रीय राज्य मंत्री तोखन साहू ह कहिन कि श्री रामलला दर्शन योजना ह श्रद्धालु मन के आस्था अउ बिसवास के सम्मान आय, जेखर माध्यम ले समाज के हर वर्ग ला प्रभु श्रीराम के दरसन के सुभाग (सौभाग्य) मिलत हे। ओमन कहिन कि ये योजना ह मुख्यमंत्री विष्णु देव साय के संवेदनशील सोच अउ जनहित के नजरिया के एक बड़े उदाहरण आय। बिलासपुर रेलवे स्टेशन मा गाजा-बाजा, करमा-नाचा, टीका, फूल-माला अउ फूल के बरखा के संग सरधालु मन के स्वागत करे गीस। श्रद्धालु मन के चेहरा मा खुशी अउ भक्ति के भाव साफ दिखत रीहीस। अयोध्या धाम के संग-संग सरधालु मन काशी विश्वनाथ के घलो दरसन करहीं।
सरधालु मन ह जताइन मुख्यमंत्री के आभार
दरसन बर जावत बिलासपुर के श्रीकांत गुप्ता, तखतपुर के बलदाऊ गुप्ता अउ बिलासपुर के रहइया कुवंरिया बाई ह मुख्यमंत्री विष्णु देव साय ला हिरदे ले धन्यबाद दीन। ओमन कहिन कि श्री रामलला के दरसन करना ओखर जिनगी के सबले बड़े सुभाग आय, जऊन ह मुख्यमंत्री श्री साय के कोसिस ले पूरा हो पावत हे। ओमन कहिन कि गरीब परिवार मन बर एतका बढ़िया अउ सम्मानजनक व्यवस्था होना, सपना पूरा होय कस आय। मुख्यमंत्री के संवेदनशीलता के सेती आज कतको माई-लोगन (महिला) मन ला श्री रामलला के दरसन के मउका मिलत हे।
जतरा मा सुविधा के पूरा इंतजाम
बता दन कि ये स्पेशल ट्रेन मा बिलासपुर जिला के 225 श्रद्धालु घलो सामिल हें। श्री रामलला दर्शन योजना के तहत श्रद्धालु मन बर अयोध्या आवे-जाय, रहे, मंदिर दरसन, जलपान अउ जेवन के जम्मो व्यवस्था करे गे हे। संग मा यात्रा के बखत टूर एस्कॉर्ट, सुरक्षा के जवान अउ डॉक्टर मन के टीम घलो श्रद्धालु मन के संग मा मौजूद रही।
