150 आधुनिक कमरा के संग भव्य परिसर ले मध्य भारत में बनही नवा पहचान
सेवा अउ सामाजिक चेतना के बनही नवा केंद्र
रायपुर: पर्यटन अउ संस्कृति मंत्री राजेश अग्रवाल ह अंबिकापुर में बनेइय्या ‘श्री अग्रोहा पैलेस’ के बिधिवत भूमिपूजन करके ओकर आधारशिला रखिन। ए मउका में ओमन कहिन कि परम पूज्य महाराजा अग्रसेन जी के बंसज होय के गरब सिरिफ हमर पहचान नोहे, बल्कि एक बड़े जिम्मेदारी घलो आय। सेवा, त्याग अउ लोकमंगल के परंपरा ला आगू बढ़ावत ये परियोजना समाज के सामूहिक संकल्प अउ सहभागिता के चिनहा बनही।
मंत्री श्री अग्रवाल ह कहिन कि कोनो भी भवन के सार्थकता सिरिफ ओकर भौतिक रूप ले नई होवय, बल्कि ओमा समाये सेवा भावना अउ समाज बर समर्पण ले होथे। ओमन बिसवास जताइन कि जम्मो समाज के सहयोग ले बनइय्या ‘श्री अग्रोहा पैलेस’ आवेइय्या बखत में जनसेवा, सामाजिक जागरूकता अउ सामुदायिक काम के बड़े केंद्र बनही। ओमन बताइन कि ये भव्य परिसर में 150 आधुनिक कमरा, बड़का हॉल अउ जम्मो सुबिधा ले भरमार लॉन रहिही, जेकर ले ये सिरिफ छत्तीसगढ़ में नई बल्कि पूरा मध्य भारत में अपन अलग पहचान बनाही।
ए मउका में सांसद बृजमोहन अग्रवाल ह कहिन कि अग्र समाज के इतिहास सेवा, समर्पण अउ लोककल्याण के गौरवशाली परंपरा ले भरे हे। हमर पुरखा मन ह धरमसाला, बावली अउ अन्न क्षेत्र बनाके मनखे मन के सेवा के बड़े आदरस देखाय हें। ओमन कहिन कि कोनो भी भवन सिरिफ ईंटा-पथरा ले नई बने, बल्कि ओमा समाये भावना, सहभागिता अउ सेवा के भाव ले जीवंत बनथे।
सांसद श्री अग्रवाल ह समाज के मनखे मन ले गोहरावत कहिन कि ये काम ला सफल बनाय बर समाज के आखिरी मनखे ला घलो जोड़व। संग मा ओमन गरीब लइका मन के पढ़ाई-लिखाई, जरूरतमंद मरीज मन के इलाज अउ बेटी मन के बिहाव-बारी मा सहयोग देय के संकल्प लेय के बिनती करिन, ताकि ‘श्री अग्रोहा पैलेस’ सही मायने मा समाज सेवा के एक जिंयती केंद्र बन सके।
कार्यक्रम मा अग्रवाल सभा अंबिकापुर के अध्यक्ष संजय मित्तल, अजय अग्रवाल, बाबूलाल गोयल, योगेश अग्रवाल, विनोद, कृष्ण कुमार, मनोज जैन के संग समाज के कतको गणमान्य अउ बुद्धिजीवी मन मौजूद रहिन।
