रायपुर। स्वाधीनता आंदोलन के संग- संग राष्ट्र अउ समाज के नवनिर्माण म आदिवासी नायक अउ महापुरूष मन के अद्वितीय योगदान हे। हल्बा, हल्बी अउ आदिवासी समाज सहित संपूर्ण भारतवर्ष के गौरव शहीद गैंद सिंह नायक ह हमर देश म आजादी के आंदोलन के सर्वप्रथम शंखनाद करे रीहिन। मुख्यमंत्री विष्णु देव साय आज जिला मुख्यालय दुर्ग के गोकुल नगर स्थित हल्बा शक्ति स्थल म अखिल भारतीय हल्बा-हल्बी समाज द्वारा आयोजित 35वां मिलन समारोह अउ शक्ति दिवस पर्व ल सम्बोधित करत ए बात कहिन।
मुख्यमंत्री साय ह ए मौका म हल्बा-हल्बी समाज के नवनिर्मित कार्यालय के लोकार्पण घलो करिन। साय ह शक्ति स्थल म प्रतियोगी परीक्षा के तैयारी करत हल्बा समाज के युवा-युवती मन ल आवासीय कोचिंग सुविधा प्रदान करने बर 50 लाख रूपया अउ पुलगांव दुर्ग स्थित कंवर समाज के सामाजिक भवन म बाउण्ड्रीवॉल निर्माण बर 25 लाख रूपया के स्वीकृत करे जाए के घोषणा घलो करिन। ए अवसर म ओमन ह हल्बा-हल्बी समाज के सामाजिक पत्रिका ’समाज’ के घलो विमोचन करिन।
मुख्यमंत्री साय ह आगु कहिन कि छत्तीसगढ़ राज्य सहित पूरा देश म आजादी के आंदोलन के सूत्रपात सर्वप्रथम जनजातीय समाज के नायक मन ह करे रहिन। शहीद वीर नारायण सिंह, शहीद गैंद सिंह नायक सहित जनजाति नायक अउ देशभक्त मन ह अंग्रेज मन के खिलाफ कुल 14 क्रांती के शंखनाद करे रीहिन। ओमन कहिन कि पूर्व प्रधानमंत्री स्व. वाजपेयी ह जनजाति वर्ग के उत्थान अउ विकास बर सर्वप्रथम केन्द्रीय जनजाति कार्यालय मंत्रालय के गठन घलो करे गिन। प्रधानमंत्री नरेन्द्र मोदी के पहल म राजधानी रायपुर म जनजाति समाज के नायक अउ वीर सपूत मन के योगदान अउ अमर गाथा ल नवा पीढ़ी ले परिचित कराए के संग उखर संरक्षण अउ संवर्धन बर विशाल आदिवासी संग्रहालय के निर्माण करे गिस हे।
