खातू के कालाबाजारी करइया मन ऊपर होही कड़ी कार्रवाई; हर जिला म सुगंधित धान के खेती ल मिलही बढ़ावा
रायपुर. कृषि उत्पादन आयुक्त शहला निगार ह बैठक म पीएम किसान पोर्टल ले एग्रीस्टेक पोर्टल म किसान मन के पंजीयन (रजिस्ट्रेशन) के काम ल तेजी ले पूरा करे के निर्देश दीन। ओमन कहिन कि बीजा अउ खातू (उर्वरक) बांटे बर नवा ई-वितरण प्रणाली लागू करे जाय। खेती ल बढ़िया बनाय बर हरी खाद, जैव उर्वरक अउ नील-हरित काई के उपयोग ल बढ़ाए बर किसान मन ल प्रोत्साहित करे जाय।
श्रीमती निगार के अध्यक्षता म आयोजित संभागीय समीक्षा बैठक म रबी सीजन 2025-26 के काम अउ खरीफ सीजन 2026 के तैयारी बर रणनीति तइयार करे गिस। ए बैठक म कृषि, उद्यानिकी, सहकारिता अउ विपणन विभाग के बड़े अफसर संगे-संग जम्मो जिला के कलेक्टर मन मौजूद रिहिन।
बैठक म रासायनिक खातू मन के जमाखोरी, कालाबाजारी अउ डायवर्जन (गलत उपयोग) ल रोके बर जिला प्रसासन ल कड़ी कार्रवाई करे के निर्देश दिए गे हें। श्रीमती निगार ह कहिन कि हर जिला म सुगंधित धान के किस्म मन के पैदावार बढ़ाय जाय। उहें, गरमी दिन के धान (ग्रीष्मकालीन धान) के रकबा ल कम करके ओकर जगह म दलहन-तिलहन (दाल अउ तेल वाले फसल) के विस्तार करे जाय।
श्रीमती निगार ह उद्यानिकी के क्षेत्र म ऑयल पाम, मखाना अउ मसाला फसल मन ल बढ़ाए के निर्देश दीन। किसान मन ल ओकर फसल के सही दाम मिले, एकर बर समर्थन मूल्य म खरीदी करइया समितियों ल सुघर ढंग ले चलाय ऊपर खास जोर दीन गिस।
