रायपुर। उप मुख्यमंत्री अरुण साव आज महासमुंद के बसना विकासखंड के बोहारपार म कर्मा माता मंदिर प्राण प्रतिष्ठा अउ सम्मान समारोह म शामिल होइन। ओमन ह उहां नवनिर्मित कर्मा माता मंदिर म पुष्प अर्पित करके पूजा-अर्चना करिन। उप मुख्यमंत्री साव ह ए मौका म आयोजित कार्यक्रम ल संबोधित करत कहिन कि बोहारपार म बड़ सुघ्घर अउ भव्य कर्मा माता मंदिर के स्थापना करे गिस.ए मंदिर के निर्माण ले सनातन के परंपरा अउ सनातन के विचार अवश्य ही फलीभूत होहि। ओमन ह भक्त माता कर्मा के महिमा बतात कहिन कि ए मंदिर के निर्माण केवल पूजा-अर्चना बर ही नही होए हे बल्कि एखर ले सनातनी संस्कार ल घलो मजबूती मिलहि।
उप मुख्यमंत्री साव ह मंदिर परिसर म अहाता निर्माण बर 25 लाख रुपया देय के घोषणा करिन। सांसद रूपकुमारी चौधरी, विधायक संपत अग्रवाल अउ संदीप साहू घलो कार्यक्रम म शामिल होइन।
विधायक संपत अग्रवाल ह कार्यक्रम म अपन संबोधन म कहिन कि मंदिर निर्माण बर योगदान देवइया जम्मों झन ल में आज प्राण प्रतिष्ठा के अवसर म बधाई अउ शुभकामना देत हों। ओमन ह मंदिर परिसर म सामुदायिक भवन के निर्माण बर विधायक निधि ले 21 लाख रुपया दे के घोषणा करिन।
प्रदेश साहू संघ के अध्यक्ष टहल सिंह साहू ह मंदिर निर्माण बर शुभकामना देवत कहिन कि आज के समय म घर म संस्कार बचाना जरूरी हे, तब जाके एक बेहतर समाज के निर्माण होहि। तभे माता कर्मा मंदिर के लक्ष्य सही मायने म पूरा होहि। तेलघानी बोर्ड के अध्यक्ष जितेन्द्र साहू, बसना नगर पंचायत अध्यक्ष खुशबू अग्रवाल, प्रदेश साहू संघ के उपाध्यक्ष मालकराम साहू अउ जिला साहू संघ के अध्यक्ष धरम दास साहू सहित साहू समाज के अनेक पदाधिकारी अउ गणमान्य नागरिक बड़का संख्या म कार्यक्रम म मौजूद रीहिन।
