आज के भागदौड़ भरे जिनगी मा फिटनेस अउ वेलनेस ला पहिली मानना अब्बड़ जरूरी — वित्त मंत्री ओपी चौधरी
पुलिस जवान मन, ओमन के परिवार अउ इहां के युवा ला मिलिही आधुनिक जिम सुबिधा के लाभ
रायपुर. वित्त मंत्री ओपी चौधरी ह आज पुलिस लाइन उर्दना, रायगढ़ मा नवा जमाना के आधुनिक सुबिधा ले लैस ‘पुलिस जिम’ के लोकार्पण करिन। ओमन ह फीता काट के जिम के सुरुअत करिन अउ जिम कोठरी मा बिराजे पवनसुत हनुमान जी के फोटो मा पूजा-पाठ करके परदेस के मनखे मन के सुख, सेहत अउ सुरक्छा बर दुआ करिन।
ए मउका मा वित्त मंत्री ओपी चौधरी ह जिम मा लगे आधुनिक फिटनेस मशीन अउ सामान ला देखिन अउ कहिन कि आज के ए ब्यस्त जिनगी मा सरीर के फिटनेस अउ मन के सांती (मानसिक वेलनेस) दोनो ला पहिली मानना अब्बड़ जरूरी हे। ओमन ह जम्मो मनखे मन ला रोज दिन कम से कम 30 मिनट कसरत (व्यायाम) करे बर समे निकाले के सलाह दिन।
ओमन कहिन कि पुलिस के जवान मन चौबीसों घंटा जनता के सेवा अउ कानून-व्यवस्था के जिम्मेदारी ला निभावथें। अइसन मा ओमन के शारीरिक अउ मानसिक रूप ले तंदुरुस्त रहना अब्बड़ जरूरी हे। ये आधुनिक जिम ह सिरिफ पुलिस के जवान मन बर च नई, भलुक ओमन के परिवार वाले मन अउ इहां के युवा मन बर घलो अब्बड़ गुनकारी साबित होही अउ एक बने अउ अनुशासित जिनगी जिए बर बढ़ावा देही।
वरिष्ठ पुलिस अधीक्षक (एसएसपी) शशि मोहन सिंह ह बताइन कि पुलिस जवान मन ला तनाव ले दूर रखे बर अउ ओमन के काम करे के छमता ला बढ़ाए बर रायगढ़ पुलिस डहर ले योग, खेल-कूद अउ फिटनेस के काम-बूता ला बिसेस सरधा (प्राथमिकता) दिये जात हे। एही उदेस्य से पुलिस जिम ला अउ सुधारे गे हे अउ एमा नवा जमाना के आधुनिक मशीन मन लगाए गे हें। ओमन कहिन कि ए सुबिधा ले पुलिस के जवान मन रोज कसरत करके अपन फिटनेस ला बनाए रख सकिहें, जेकर सुग्घर असर ओमन के सेहत अउ काम दोनो ऊपर पडही।
ए कार्यक्रम मा महापौर जीवर्धन चौहान, कलेक्टर मयंक चतुर्वेदी, सभापति डिग्रीलाल साहू के संग कतको जनपरतिनिधि अउ पुलिस के अधिकारी-करमचारी उपस्थित रीहिन।