- एक मूकबधिर जोड़ा संग हिंदू अउ ईसाई समाज के नवदंपत्ति ह संग निभाय के कसम खाइन
- हर जोड़ा ला 50 हजार रुपय के सहायता, जनप्रतिनिधि अउ अधिकारी मन ह दीन असीस
रायपुर, मुख्यमंत्री विष्णुदेव साय के अगुवई मं चलत ‘मुख्यमंत्री कन्या विवाह योजना’ के तहत जशपुर जिला मं सुकवार के सामूहिक बिहाव कार्यक्रम के आयोजन करे गिस। जशपुर जिला के अलग-अलग परियोजना क्षेत्र मं होय ए कार्यक्रम मं कुल 65 जोड़ा के बिहाव होइस। एमं हिंदू अउ ईसाई दूनों समाज के जोड़ा के बिहाव ओमन के पारंपरिक रीति-रिवाज के संग पूरा करे गिस।
ए आयोजन के खास बात ए रहिस कि बगीचा परियोजना क्षेत्र मं एक दिव्यांग (मूकबधिर) जोड़ा ह घलो बिहाव के बंधन मं बंध के सबो बर प्रेरणा बनिस। कार्यक्रम मं पहुंचे जनप्रतिनिधि, अधिकारी अउ गांव वाले मन ह नवदंपत्ति ला असीस दीन अउ ओमन के सुखद अउ समृद्ध वैवाहिक जिनगी के कामना करिन।
बगीचा परियोजना मं 13 हिंदू अउ 7 ईसाई समाज के कुल 20 जोड़ा के बिहाव होइस। कांसाबेल परियोजना मं 9 हिंदू अउ 3 ईसाई समाज के कुल 12 जोड़ा मन के बिहाव होइस। ओसने बागबहार परियोजना मं 6 हिंदू अउ 26 ईसाई समाज के कुल 32 जोड़ा के बिहाव कराए गिस।
कार्यक्रम मं जिला पंचायत अउ जनपद पंचायत के जनप्रतिनिधि संग अलग-अलग विभाग के अधिकारी उपस्थित रहिन। सबो ह नवा जोड़ा ला बधाई देवत कहिन कि मुख्यमंत्री कन्या विवाह योजना ह सामाजिक भाईचारा, सादगी अउ सहयोग के भावना ला मजबूत करे के एक बड़े पहल आय।
महिला एवं बाल विकास विभाग डाहर ले चलत ए योजना के तहत हर जोड़ा बर 50 हजार रुपय के सहायता राशि दे जाथे। जेमं 8 हजार रुपय बिहाव के खरचा, 7 हजार रुपय के उपहार सामग्री अउ 35 हजार रुपय के राशि नोनी (वधु) के नाम मं चेक के रूप मं दे जाथे। संग ही नवा जोड़ा ला बिहाव के प्रमाण पत्र घलो दे जाथे।
मुख्यमंत्री कन्या विवाह योजना ह गरीब परिवार बर सम्मान के संग बिहाव कराए के एक बढ़िया माध्यम बनत हे। ए योजना ले न केवल परिवार ला आर्थिक मदद मिलत हे, बल्कि समाज मं सामूहिक बिहाव के बढ़िया परंपरा ला घलो बढ़ावा मिलत हे।
