मुख्य सचिव ह सम्हालिन तैयारी के कमान, सुरक्षा अउ सुविधा बर कड़े निरदेस
रायपुर. नवा रायपुर के शहीद वीर नारायण सिंह अंतरराष्ट्रीय क्रिकेट स्टेडियम मा आघू आय वाला 10 अउ 13 मई के टाटा आईपीएल टी-20 मैच के सफल आयोजन बर राज्य सासन ह कमर कस ले हे। मुख्य सचिव विकासशील ह आज मंत्रालय महानदी भवन मा अलग-अलग विभाग के बड़े अधिकारी मन के संग एक समीक्षा बैठक करिन अउ आयोजन ले जुड़े जम्मो व्यवस्था ल चकाचक करे के निरदेस दीन। मुख्य सचिव के ए कड़े निरदेस के बाद अब नवा रायपुर के प्रशासन क्रिकेट के ए महाकुंभ के मेजबानी बर पूरी तहन ले तैयार हे, जेकर ले दर्शक ल एक सुरक्षित अउ आनंदमयी अनुभव मिल सकय।
मैच मन के शेड्यूल
10 मई 2026: रॉयल चैलेंजर्स बेंगलुरु (RCB) बनाम मुंबई इंडियंस (MI)
13 मई 2026: रॉयल चैलेंजर्स बेंगलुरु (RCB) बनाम कोलकाता नाइट राइडर्स (KKR) के बीच मैच खेला जाही।
सुरक्षा अउ यातायात प्रबंधन मा खास जोर
मुख्य सचिव विकासशील ह साफ कर दीन कि स्टेडियम मा आय वाला हजारों दर्शक के सुरक्षा अउ सुगम यातायात सासन के पहिली प्राथमिकता आय। ऑनलाइन बुकिंग के बाद रायपुर पहुंचे वाला दर्शक के भारी भीड़ ल नियंत्रित करे बर पुलिस कमिश्नर रायपुर ल खास कार्ययोजना बनाय के निरदेस दिय गे हे। पार्किंग एरिया अउ स्टेडियम के चारों मुड़ा CCTV कैमरा मन के सघन जाल बिछाय जाही। बैरिकेडिंग अउ पार्किंग के जिम्मेदारी पुलिस, NRDA अउ BCCI के संयुक्त टीम सम्हाली।
आपातकालीन सेवा
फायर ब्रिगेड अउ एम्बुलेंस बर खास रस्ता (Emergency Route) तय करे जाही ताकि कोनो भी आपात स्थिति मा तुरंते मदद पहुंचाय जा सकय। आयोजन के बने ढंग ले संचालन बर कलेक्टर रायपुर के अध्यक्षता मा एक उच्च-स्तरीय कार्यकारिणी के गठन करे गे हे। एमा पुलिस अधीक्षक (ग्रामीण), आयुक्त नगर निगम, संचालक (खेल अउ युवा कल्याण), क्षेत्रीय परिवहन अधिकारी (RTO), अउ NRDA के CEO सहित दूसर बड़े अधिकारी सामिल हें। हालांकि पूरा आयोजन के जिम्मेदारी BCCI अउ छत्तीसगढ़ स्टेट क्रिकेट संघ के आय, फेर सासन ह पानी, बिजली, सड़क अउ स्वास्थ्य सेवा मा पूरा सहयोग करही।
बुनियादी सुविधा के उपलब्धता
लोक स्वास्थ्य यांत्रिकी विभाग (PHE) ल स्टेडियम मा पानी के बने बहाव अउ पर्याप्त आपूर्ति पक्का करे के जिम्मेदारी दिय गे हे। बिजली विभाग ल मैच के बखत छत्तीसगढ़ विद्युत वितरण कंपनी ल बिना कोनो रुकावट के बिजली सप्लाई करे के निरदेस दिय गे हे।ए बैठक मा लोक निर्माण विभाग के सचिव डॉ. कमलप्रीत सिंह, PHE सचिव मोहम्मद कैसर अब्दुल हक, खेल सचिव यशवंत कुमार अउ कलेक्टर रायपुर गौरव सिंह सहित पुलिस विभाग, ऊर्जा, परिवहन, पर्यटन अउ CSPDCL के बड़े अधिकारी उपस्थित रहिन। संगे-संग BCCI अउ छत्तीसगढ़ स्टेट क्रिकेट संघ के प्रतिनिधि ह घलो अपन तैयारी के जानकारी साझा करिन।
