रायपुर, मुख्यमंत्री विष्णुदेव साय अपन बलरामपुर जिला के प्रवास के बेरा में ग्रामीण स्वरोजगार प्रशिक्षण संस्थान (RSETI) पहुँचीन। उहाँ ओमन ट्रेनिंग लेवत महिला अउ युवा मन से गोठ-बात करिन अउ ओमन के उत्साह बढ़ाइन। ट्रेनिंग रूम में जावत खानी मुख्यमंत्री ह “जय बिहान” कह के सबो झन के जोहार करिन, जेकर से उहाँ के माहौल में एक नवा ऊर्जा भर गे। ओमन ट्रेनिंग के काम-काज ल देखिन अउ खास करके ‘पशु सखी’ अउ ‘लखपति दीदी’ मन से बात करके ओमन के अनुभव ल जानिन।
गोठ-बात के बीच में ग्राम केवली के अनुराधा गुप्ता ह बताइस कि ओ ह ‘बिहान’ योजना ले जुड़ के पशु सखी के रूप में गांव-गांव जाके पशु मन के सर्वे, इलाज में मदद अउ जागरूकता फैलाए के काम करत हे। मुख्यमंत्री ह ए बदलाव ल देख के कहिन कि – “कौशल विकास अउ ट्रेनिंग के माध्यम ले गांव के महिला मन न केवल आत्मनिर्भर बनत हें, बल्कि गांव के अर्थव्यवस्था ल घलो मजबूत बनावत हें।” बता दन कि RSETI के माध्यम ले जिला में अब तक 16 बैच में 510 झन ल स्वरोजगार बर तैयार करे जा चुके हे।
समूह के बहनी मन ल बांटीन 21 लाख के चेक एकर बाद मुख्यमंत्री ह संयुक्त जिला कार्यालय परिसर में स्व-सहायता समूह मन कोती ले लगाए गे प्रदर्शनी ल देखिन। उहाँ ओमन समूह के महिला मन से चर्चा करिन अउ ओमन के बनाए सामान मन के जानकारी लीन। कोमल स्व-सहायता समूह के श्रीमती पूर्णिमा बासिन ह बताइस कि बैंक ले मिले करजा (लोन) ले ओ ह जैविक खेती शुरू करिस अउ जीराफूल चउर उगा के एक साल में 3 लाख रुपिया के बिक्री करिस। मुख्यमंत्री ह ओकर ए सफलता के खूब सराहना करिन अउ 5 ठन समूह मन ल 21 लाख रुपिया के चेक सौंपीन।
मुख्यमंत्री श्री साय ह कहिन कि – “राज्य सरकार के योजना के असर अब जमीन में साफ़ दिखत हे। समूह के माध्यम ले महिला मन आत्मनिर्भरता के नवा मिसाल पेश करत हें अउ स्थानीय सामान ल प्रदेश स्तर में पहिचान मिलत हे।”
बाल हितैषी पंचायत बर कछिया ग्राम पंचायत सम्मानित ए सुग्घर मौका में मुख्यमंत्री ह जनपद पंचायत वाड्रफनगर के ग्राम पंचायत कछिया के सरपंच खुशबू सिंह अउ सचिव सुनीता मरावी ल ‘बाल हितैषी पंचायत’ श्रेणी में प्रदेश में पहिली नंबर आए बर शील्ड अउ प्रमाण पत्र दे के सम्मानित करिन। मुख्यमंत्री ह कहिन कि – “ए सफलता ह देखावत हे कि जब महिला मन ल नेतृत्व के मौका मिलथे, त ओमन लइका मन के भविष्य ल पहिली रख के विकास के नवा रद्दा तय करथें।”
ओमन भरोसा जताइन कि छत्तीसगढ़ के गांव मन में महिला मन के ए भागीदारी ह राज्य ल समृद्धि अउ आत्मनिर्भरता कोती तेजी ले आगू बढ़ाही।