रायपुर .छत्तीसगढ़ विधानसभा के बिसेस सत्र म मुख्यमंत्री विष्णु देव साय ह नारी शक्ति वंदन अधिनियम के समर्थन म संकल्प पेश करत कहिन कि महिला मन के सम्मान, चउतरफा विकास अउ सशक्तिकरण बर संसद अउ जम्मो विधानसभा म ओखर बर एक तिहाई आरक्षण पक्का करना जरूरी कदम ए। ओमन कहिन कि ए पहल ह न केवल लोकतांत्रिक संस्था म महिला मन के भागीदारी ल मजबूत करही, भलकुन समाज म एक बरोबर मउका अउ संतुलित प्रतिनिधित्व के डहर म एक नवा ऊर्जा घलो प्रदान करही। मुख्यमंत्री ह भरोसा जताइन कि अइसन कोसिस ले देश के आधा आबादी ल निर्णय प्रक्रिया म सशक्त भूमिका मिलही अउ विकास ह जादा समावेशी अउ प्रभावी बनही।
मुख्यमंत्री विष्णु देव साय ह कहिन कि छत्तीसगढ़ के ए पावन धरती माता सबरी, मां दंतेश्वरी अउ मां महामाया के भूमि ए, जहाँ नारी ल हमेसा शक्ति के रूप म सम्मान दे गे हे। ओमन कहिन कि भारतीय संस्कृति म नारी ह केवल सम्मान के पात्र नई ए, भलकुन सृजन अउ शक्ति के नेव (आधारशिला) घलो ए। नवरात्रि म जे शक्ति के हम पूजा करथन, ओही शक्ति समाज म मातृरूप म विद्यमान हे।
मुख्यमंत्री श्री साय ह कहिन कि हमर शास्त्र म लिखे “या देवी सर्वभूतेषु मातृ-रूपेण संस्थिता…” केवल एक श्लोक नई ए, भलकुन भारतीय जीवन-दर्शन के मूल तत्व ए। ओमन कहिन कि छत्तीसगढ़ के धरती म भक्त माता कर्मा, तीजन बाई, उषा बारले जइसन विभूति ह अपन प्रतिभा अउ समरपन ले प्रदेश के पहिचान ल राष्ट्रीय अउ अंतरराष्ट्रीय स्तर तक पहुँचाए हें। संग म, रानी लक्ष्मीबाई, रानी दुर्गावती अउ अवंती बाई जइसन वीरांगना के योगदान ल घलो ओमन प्रेरणास्रोत बताइन। आधुनिक जुग म कल्पना चावला अउ सुनीता विलियम्स जइसन महिला मन ह देश के गौरव ल दुनिया भर म बढ़ाए हें।
मुख्यमंत्री श्री साय ह कहिन कि लोकतांत्रिक व्यवस्था म महिला मन के भागीदारी अउ प्रतिनिधित्व के बिस्तार ह समाज के चउतरफा विकास बर जरूरी हे। ओमन कहिन कि जनप्रतिनिधि के कार्यक्षेत्र के बिस्तार अउ जनसंख्या बढ़ोत्तरी ल देखत समय-समय म व्यवस्थागत सुधार अउ संतुलन म विचार करना महत्वपूर्ण हे, जेकर ले शासन व्यवस्था ह जादा प्रभावी बन सकय।
ओमन कहिन कि पिछला कुछ बछर म देश म महिला मन के सम्मान, स्वास्थ्य, सुरक्षा अउ आर्थिक सशक्तिकरण के डहर म कतको महत्वपूर्ण पहल करे गे हे। स्वच्छता, स्वास्थ्य, वित्तीय समावेशन, शिक्षा अउ सुरक्षा जइसन क्षेत्र म योजना के माध्यम ले महिला मन के जीवन स्तर म बने बदलाव देखे ल मिले हे। ए कोसिस ह महिला मन के गरिमा अउ आत्मनिर्भरता ल मजबूत करे म महत्वपूर्ण भूमिका निभाए हे।
मुख्यमंत्री ह कहिन कि छत्तीसगढ़ म महिला मन के सशक्तिकरण ल बिसेस प्राथमिकता दे जात हे। बछर 2026 ल “महतारी गौरव वर्ष” के रूप म मनाए जावत हे, जेकर मकसद मातृशक्ति के योगदान ल सम्मान देना अउ ओकर चउतरफा विकास ल बढ़ावा देना हे। ओमन बताइन कि अलग-अलग योजना के माध्यम ले महिला मन ल आर्थिक सहायता, स्वरोजगार के मउका अउ सामाजिक सुरक्षा दे जात हे।
ओमन कहिन कि दुरिहा अउ चुनौतीपूर्ण इलाका म घलो महिला मन तक योजना के लाभ पहुँचाए बर बिसेस कोसिस करे जात हे। एकर ले न केवल ओकर जीवन स्तर म सुधार आए हे, भलकुन ओमन समाज के मुख्यधारा ले घलो जादा मजबूती ले जुड़त हें।
मुख्यमंत्री ह कहिन कि आवास, पीये के पानी, आजीविका अउ स्वरोजगार ले जुड़े योजना के माध्यम ले महिला मन ल आत्मनिर्भर बनाए के डहर म काम करे जावत हे। बड़े संख्या म महिला मन आज स्व-सहायता समूह अउ दूसर काम-काज के माध्यम ले आर्थिक रूप ले सशक्त बनत हें, जो समाज म बने बदलाव के निसानी ए।
ओमन कहिन कि पंचायती राज संस्था म महिला मन के सक्रिय भागीदारी ह लोकतंत्र ल मजबूत बनाए के एक बड़े उताहरन ए। बड़े संख्या म महिला मन जनप्रतिनिधि के रूप म अगुवाई करत हें अउ स्थानीय विकास म महत्वपूर्ण भूमिका निभात हें।
मुख्यमंत्री ह कहिन कि महिला मन ल परिवार अउ समाज म सशक्त बनाए बर अलग-अलग स्तर म बने पहल करे जात हे, जेकर ले ओमन कोनो भी फैसला (निर्णय) लेवे म अपन प्रभावी भूमिका निभा सकंय।
अपन गोठ-बात के आखिरी म मुख्यमंत्री श्री साय ह कहिन कि मातृशक्ति के सशक्तिकरण ह केवल कोनो नीति के बिसे नई ए, भलकुन समाज के चउतरफा विकास के आधार ए। ओमन सब्बो वर्ग ले ए डहर म सहयोग अउ संवेदनशीलता के संग काम करे के गोठ कहिन, ताकि एक बरोबर, सशक्त अउ समृद्ध समाज बन सकय।
