सम्मान, सुरक्षा अउ आत्मनिर्भरता कोति एक बड़े कदम
डॉ. दानेश्वरी संभाकर उप संचालक (जनसंपर्क)
रायपुर. छत्तीसगढ़ सरकार डाहर ले सियान मन के सम्मान, सुरक्षा अउ ओमन के भलाई ल सबले पहिली प्राथमिकता दे जावत हे। मुख्यमंत्री विष्णु देव साय के अगुवाई में राज्य सरकार ह वृद्धजन मन बर एक मजबूत अउ मयारू सामाजिक सुरक्षा के ढांचा तैयार करे हे, त उहें समाज कल्याण मंत्री लक्ष्मी राजवाड़े के देख-रेख में विभाग के योजना ह जमीनी स्तर में बढ़िया ढंग ले चलत हें। ए कोशिश ले हमर सियान मन ल आर्थिक, सामाजिक अउ भावनात्मक रूप ले ताकत मिलत हे।
सरल रस्ता, असान ले लाभ
राज्य में सियान मन ल सरकारी योजना के लाभ लेवय बर कोनो अलग ले “सीनियर सिटीजन कार्ड” बनवाए के जरूरत नइ हे। आधार कार्ड अउ आन जरूरी कागज के मदद ले उमर अउ पात्रता के जांच कर के सीधा लाभ दे जावत हे। एखर ले जम्मो प्रक्रिया ह साफ-सुथरा, सरल अउ असान हो गे हे।
वृद्धाश्रम :- सम्मान ले जिए आधार
प्रदेश के राजधानी रायपुर समेत अलग-अलग जिला में चलत 27 ठन वृद्धाश्रम ह बेसहारा अउ असहाय सियान मन बर एक सुरक्षित ठउर बन के उभरे हें। अभी के बखत में इहाँ 675 वृद्धजन मन लाभ उठावत हें। इहाँ सियान मन बर मुफत में रहे के जगह, बढ़िया खाना-पीना, कपड़ा अउ आन जरूरी सुविधा मन हर दिन उपलब्ध कराए जावत हे, जेखर ले ओ मन ल सम्मान के साथ जिनगी जिए के मउका मिलत हे।
पैलिएटिव केयर (प्रशामक गृह) :- खास देख-रेख के इंतजाम
जउन सियान मन बहुत जादा बीमार हें अउ बिस्तर में परे हें, ओमन बर राज्य में 13 ठन प्रशामक गृह चलाए जावत हे। अभी के बखत में रायपुर, कबीरधाम, दुर्ग, बालोद, रायगढ़ अउ बेमेतरा में 140 सियान मन एखर लाभ उठावत हें। ए केंद्र में ओमन के हरदम देख-रेख, इलाज में मदद अउ जरूरी सुविधा दिए जाथे, ताकि अइसन नाजुक हालत में घलो ओमन ल मया अउ सम्मान के साथ जिनगी मिल सके।
वृद्धावस्था पेंशन :- आर्थिक मजबूती के आधार
सामाजिक सुरक्षा के तहत जतका पात्र सियान हें, ओमन ल हर महीना पेंशन दिए जावत हे। बीपीएल (BPL) अउ एसईसीसी (SECC) वर्ग के सियान मन ल 500 रुपिया हर महीना अउ 80 बछर ले जादा उमर के सियान मन ल 680 रुपिया हर महीना पेंशन दिए जावत हे। ए मदद ले ओमन के रोज के जिनगी में आत्मनिर्भरता अउ आत्मसम्मान बाढ़त हे।
सहायक उपकरण अउ तीर्थ यात्रा :- नवा उमंग अउ जोस
सियान मन ल सहायक उपकरण देवाय के योजना के तहत, सरकार ह गरीबी रेखा के नीचे रहने वाला 60 बछर या ओखर ले जादा उमर के बेसहारा सियान मन ल ओमन के जरूरत के हिसाब ले समान उपलब्ध करावत हे। ए योजना में डाक्टर के सलाह के आधार में 6900 रुपिया तक के समान जैसे— व्हीलचेयर, वॉकर, बैसाखी, लाठी, कान के मशीन, चश्मा, ट्राइसाइकिल अउ आन जरूरी चीज मन दिए जाथे, ताकि ओमन के जिनगी अउ असान हो सके।
एखर साथ-साथ 19 ठन बड़े तीर्थ ठउर मन के यात्रा कराए जावत हे, जेखर ले सियान मन ल आध्यात्मिक अउ मानसिक सांति मिलत हे। बछर 2025-26 में 14 बार तीर्थ यात्रा कराए गे हे, जेमा 10 हजार 694 सियान मन ह लाभ उठाए हें।
जम्मो भलाई बर लगातार कोसिस
छत्तीसगढ़ सरकार के लछ्य सिरिप मदद करना भर नइ हे, बल्कि सियान मन ल समाज के मुख्यधारा ले जोड़ के ओमन ल आगे बढ़ाना घलो हे। पेंशन, स्वास्थ्य के देख-रेख, रहे के ठिकाना, सहायक सुविधा अउ सामाजिक जुड़ाव के माध्यम ले राज्य ह अपन सियान मन बर एक मजबूत, मयारू अउ जम्मो सुरक्षा वाला ढांचा तैयार करत हे।
विष्णु देव साय अउ मंत्री लक्ष्मी राजवाड़े के अगुवाई में ए कोसिस ह आने वाला बखत में सियान मन के जिनगी ल अउ जादा सम्मानजनक अउ सुग्घर बनाए बर अइसने आगे बढ़त रही।
