करी पालन बनिस जीविका के बड़ माध्यम, मुख्यमंत्री ल दीन धन्यवाद
रायपुर. प्रदेश सरकार के फ्लैगशिप ’महतारी वंदन योजना’ ह छत्तीसगढ़ के महिला मन बर न केवल आर्थिक सहारा, बल्कि आत्मनिर्भर बने के नवा अधार बनत हे। विशेष पिछड़ी जनजाति पहाड़ी कोरवा समुदाय के करियो के जिनगी म ए योजना ह खुसहाली लेके आय हे। अम्बिकापुर विकासखण्ड के ग्राम रामनगर म रहइया करियो ह योजना ले मिले सहायता रासि के सुग्घर उपयोग करके न केवल अपन भविस ला संवारिस हे, बल्कि अपन पूरा परिवार के स्थिति ला घलो सुधारिस हे।
योजना के पैसा ला बनाइन आत्मनिर्भरता के माध्यम
करियो ह बताइस कि पहिली ओकर परिवार के आर्थिक हालत ह बहुत खराब रहीस। रोज के खरचा बर ओला भारी मेहतन अउ संधर्स करे बर परत रहीस। महतारी वंदन योजना के सुरू होय के बाद, जब ओकर खाता म पइसा आय बर सुरू होइस, त ओ ह एला घर के खरचा म उड़ाए के बदला निवेश करे के रद्दा चुनिस। ओ ह ए पैसा ला बटोर के बकरी मन ला खरिदिस अउ पशुपालन सुरू करिस।
बकरी पालन ले मिलीस आर्थिक मजबूती
अपन सफलता के गोठ बात करत करियो ह बताइस कि, “मैं ह योजना के पइसा ले बकरी मन ला खरिदेंव अउ साल भर ओकर मन के जतन करेंव। अब मोर करा छह ठन बकरी हावे। बकरी मन बखत-बखत म बच्चा देथें, जेकर ले ओकर के संख्या बाढ़त जावत हे। अब मोला ए मन ले लगातर लाभ मिलत हे अउ मैं ह अपन गुजारा एखरे माध्यम ले सुरक्षित कर ले हंव।”
परिवार के खुसहाली अउ सुग्घर खान-पान
आर्थिक हालत सुधरे ले करियो अब अपन घरवाला अउ नाती-पोता मन के सुग्घर देखभाल कर पावत हे। ओ ह कहिथे कि पहिली अउ अब के जिनगी म बड़े बदलाव आ गे हे। अब घर म सुग्घर खान-पान हे अउ लइका मन के भविस घलो सुरक्षित हो गे हे। ओ ह भावुक होके कहिस, “ए सब सरकार के मदद ले ही हो पाय हे, नइ तो हमर बर ए सब सोचना घलो मुस्किल रहीस।”
योजना बर जताइन आभार
अपन अउ अपन परिवार के बदलत सुरत ला देख के करियो ह मुख्यमंत्री विष्णु देव साय के आभार मानिस अउ कहिस कि महतारी वंदन योजना ह ओला समाज म मान-सम्मान ले जियें के मउका दिस हे। ओकर कहना हे कि ए योजना ह गांव-गंवई अउ जनजाति इलाका के महिला मन बर कोनो वरदान ले कम नोहे।
