कच्ची झोपड़ी ले पक्के सपना तक, सासन के योजना मन ह बदलीस तक़दीर
रायपुर. ग्राम पंचायत सिलगेर (विकासखंड कोन्टा) के रहइया माड़वी कोसा बर बछर मन पुराना सपना अब पूरा हो गे हे। जेकर परिवार कभू मुस्किल बखत मा टुटहा झोपड़ी मा जिनगी काटत राहय, आज ओकर करा एक ठन सुरक्षित, सम्मानजनक अऊ मजबूत पक्का घर हे। नियद नेल्लानार योजना अऊ प्रधानमंत्री आवास योजना–ग्रामीण के मेल-जोल ले ओकर जिनगी मा अइसन बदलाव आईस, जे ह संघर्ष ला उम्मीद मा बदल दीस।
ए बदलाव के असली अधार बनीस ‘रूरल मेसन ट्रेनिंग’ (मिस्त्री प्रशिक्षण), जेला ‘मेरापथ एजुकेशन प्राइवेट लिमिटेड’ डाहर ले ग्राम पंचायत स्तर मा चलाय गीस। ए प्रशिक्षण ला पाके कोसा ह सिरिफ घर बनाय के तरीका भर नई सीखीस, बल्कि आत्मविश्वास के संग अपन हाथ ले अपन घर ला बना के देखा दीस। ए कहानी सिरिफ एक ठन मकान बने के नोहे, बल्कि एक मनखे के आत्मनिर्भर बने अऊ अपन भबिस्य ला अपन हाथ ले गढ़े के एक ठन मिसाल आय।
बछर 2024–25 मा प्रधानमंत्री आवास योजना–ग्रामीण के तहत श्री कोसा ला 1.20 लाख रुपिया के आवास मंजूरी मिलीस। एखर संग मनरेगा डाहर ले 95 दिन के काम अऊ 23,085 रुपिया के मजदूरी सहायता दे गीस, जेकर ले घर बनाय मा तेजी आईस। ओती स्वच्छ भारत मिशन ले 12,000 रुपिया मा शौचालय निर्माण, सोलर पैनल ले अंजोर अऊ नल-जल योजना ले घर तक साफ पानी मिले ले ओकर परिवार के जिनगी अब सुग्घर अऊ सुरक्षित हो गे हे।
ए प्रेरणादायक बदलाव ऊपर कलेक्टर अमित कुमार ह जिला बर एला एक ठन नमूना बतावत कहिन कि, “जदि सासन के योजना मन के सही ढंग ले काम होय अऊ संग मा मनखे ला हुनर मिल जाय, त अइसने परिवार मन आत्मनिर्भर बन सकथें।” ओती जिला पंचायत सीईओ मुकुंद ठाकुर ह एला एक ठन सफल उदाहरण बताइन अऊ कहिन कि, “सीखय-सिखाय ले काम मा सुघरई आथे अऊ हितग्राही ह खुद मजबूत बनथे।”
मुख्यमंत्री के प्रवास के बखत, मुख्यमंत्री विष्णुदेव साय ह श्री कोसा ले गोठ-बात करीन अऊ ओला साल-श्रीफल भेंट करके घर के सांकेतिक चाबी सउंपीन अऊ ओकर सनमान करीन।
आज माड़वी कोसा के ए पक्का घर ह सिरिफ ईंटा-पथर के ढांचा नोहे, बल्कि संघर्ष ले सफलता तक के ओ कहानी आय जे ह पूरा इलाका ला मिहनत करे के प्रेरणा देवत हे।
