मुख्य सचिव विकासशील ह घलो स्व-गणना के तहत अपन जानकारी दर्ज करिन
रायपुर. छत्तीसगढ़ मा जनगणना 2027 के पहिली चरन मा मकान के सूची बनाय अउ मकान गणना के सिलसिला मा 16 ले 30 अप्रैल 2026 तक ‘स्व-गणना’ (खुद ले जानकारी भरना) के प्रक्रिया सुरू होगे हे। आज मंत्रालय महानदी भवन मा मुख्य सचिव विकासशील ह स्व-गणना के तहत अपन जानकारी खुद दर्ज करिन। ए मउका मा अपर मुख्य सचिव (गृह) मनोज कुमार पिंगुआ, छत्तीसगढ़ जनगणना निदेशक कार्तिकेय गोयल संग जनगणना निदेशालय के अधिकारी मन घलो मौजूद रिहिन।
मुख्य सचिव ह परदेस के जम्मो मनखे ले अरजी करे हवंय कि:”ए सुविधा के जादा ले जादा फायदा उठावंय अउ अपन जानकारी खुद भर के जनगणना मा अपन भागीदारी निभावंय।”राज मा 16 अप्रैल ले 30 अप्रैल 2026 तक नागरिक मन ला स्व-गणना के माध्यम ले अपन जानकारी भरे के मउका दिये गे हे। आज अपर मुख्य सचिव (गृह) मनोज कुमार पिंगुआ ह घलो पोर्टल मा जाके अपन जानकारी भरिन। स्व-गणना बर se.census.gov.in पोर्टल मा जाके अराम ले सबो विवरण भरे जा सकत हे।
मुख्य सचिव ह कहिन कि ए पहल ह जनगणना के काम ला आसान, साफ-सुथरा (पारदर्शी) अउ भरोसा के लायक बनाय बर एक बड़े कदम आय, जेकर ले मनखे मन अपन सही अउ पूरा जानकारी खुद बता सकिहीं। स्व-गणना के समय सिराय के बाद, 1 मई ले 30 मई तक जनगणना के टीम ह घर-घर जाही अउ मनखे मन ले जानकारी इकट्ठा करी। प्रगणक (जानकारी लिखे वाला) मन घर-घर आके जानकारी दरज करिहीं।
ए काम के मुख्य बात मन ए हवंय:
- हर मकान के जानकारी दरज करे जाही।
- घर के स्थिति, सुविधा अउ जरूरी जानकारी मन ला बटोरे जाही।
- जउन मन स्व-गणना (खुद ले जानकारी भरना) कर डारे हवंय, उमन जब प्रगणक घर आहीं त SE ID ला जरूर बतावंय।
- जदि कोनो स्व-गणना नहीं कर पाही, त ओला चिंता करे के जरूरत नहीं हे। छत्तीसगढ़ मा 1 मई ले 30 मई 2026 के बीच प्रगणक मन आप मन के घर आके जानकारी जरूर दरज करिहीं।
जम्मो नागरिक मन ले बिनती करे गे हे कि उमन ए मउका के लाभ उठावंय अउ देस के विकास मा अपन भागीदारी सुनिचित करंय। ए बखत मा जनगणना निदेशालय के संयुक्त संचालक प्रदीप साव अउ आन अधिकारी मन घलो सामिल रिहिन।
