रायपुर। 1 जनवरी ल छत्तीसगढ़ के पर्यटन विकास ल नवा दिशा देवइया भोरमदेव पर्यटन कॉरिडोर के भूमिपूजन होए बर जात हे। उप मुख्यमंत्री विजय शर्मा के पहल ले लगभग 146 करोड़ रूपया के लागत ले बनइया ए परियोजना के भूमिपूजन केंद्रीय पर्यटन मंत्री गजेंद्र सिंह शेखावत अउ मुख्यमंत्री विष्णुदेव साय के करकमल ले संपन्न होहि।
आयोजन के तैयारी के जायजा ले बर उप मुख्यमंत्री विजय शर्मा ह आज भोरमदेव मंदिर परिसर स्थित कार्यक्रम स्थल के निरीक्षण करिन। ओमन ह जनप्रतिनिधी अउ अधिकारी के संग समीक्षा बैठक करके तैयारी मन के विस्तार ले जानकारी लिन अउ आवश्यक दिशा-निर्देश दिन। उप मुख्यमंत्री शर्मा ह मुख्य मंच अउ बैठक व्यवस्था, जनसमुदाय के बैठक व्यवस्था, सुरक्षा व्यवस्था, यातायात, पार्किंग, पेयजल सहित आयोजन ले संबंधित अन्य जम्मों आवश्यक व्यवस्था ल समय ले पूरा करे के निर्देश दिन। ए बेर जिला पंचायत अध्यक्ष ईश्वरी साहू, जिला पंचायत उपाध्यक्ष कैलाश चंद्रवंशी, सभापति डॉ वीरेंद्र साहू, कलेक्टर गोपाल वर्मा, एएसपी पुष्पेंद्र सिंह बघेल, एडीएम विनय पोयाम सहित अन्य जनप्रतिनिधि अउ अधिकारी उपस्थित रहिन।
भोरमदेव मंदिर परिसर अपन प्राचीन स्थापत्य कला अउ धार्मिक आस्था बर प्रसिद्ध हे। पर्यटन कॉरिडोर के निर्माण ले इहां अवइया श्रद्धालु मन अउ पर्यटक ल बेहतर सुविधा मिलहि, जेखर ले क्षेत्र के आर्थिक अउ सामाजिक विकास ल घलो गति मिलहि। भोरमदेव पर्यटन कॉरिडोर परियोजना के अंतर्गत सड़क, पार्किंग, व्यू प्वाइंट, पर्यटक सुविधा केंद्र, सौंदर्यीकरण अउ अन्य बुनियादी सुविधा के विकास करे जाहि। एखर ले न केवल पर्यटक मन के संख्या म वृद्धि होहि, बल्कि स्थानीय युवा मन बर रोजगार अउ स्वरोजगार के अवसर घलो सृजित होहि।
राज्य सरकार के लक्ष्य हे कि छत्तीसगढ़ के प्रमुख पर्यटन स्थल ल आधुनिक सुविधा ले जोड़ा जाए। भोरमदेव कॉरिडोर इही सोच के परिणाम हे, जेन अवइया बछर म क्षेत्र के पहचान ल अउ मजबूत करहि। भोरमदेव पर्यटन कॉरिडोर के भूमिपूजन न केवल नवा साल के शुरुआत ल खास बनाहि, बल्कि छत्तीसगढ़ के पर्यटन मानचित्र म एक नवा उपलब्धि के रूप म दर्ज होहि। ए परियोजना राज्य के ऐतिहासिक अउ धार्मिक पर्यटन ल राष्ट्रीय अउ अंतर्राष्ट्रीय पहचान दिलाए के दिशा म एक महत्वपूर्ण कदम साबित होहि।
