रायपुर। मुख्यमंत्री विष्णु देव साय ह अपन निवास कार्यालय म स्वातंत्र्य वीर विनायक दामोदर सावरकर के जीवन म आधारित स्मारिका ‘सावरकर सौरभ’ के विमोचन करिन। स्मारिका ‘सावरकर सौरभ’ के प्रकाशन अखिल भारतीय साहित्य परिषद, छत्तीसगढ़ ह सावरकर जयंती के अवसर म करिन हे।
मुख्यमंत्री साय ह ‘सावरकर सौरभ’ स्मारिका के प्रकाशन म अखिल भारतीय साहित्य परिषद, छत्तीसगढ़ के सदस्य मन ल हार्दिक बधाई देवत कहिन कि वीर सावरकर हमर देश के सच्चा सपूत रहिन। ओमन ह मातृभूमि के सेवा म असंख्य कष्ट सहत हुए स्वतंत्रता के अलख जगायिन। उखर साहसपूर्ण जीवन के प्रेरणादायी संस्मरण ले जम्मों झन ल प्रेरणा मिलहि।
मुख्यमंत्री ल ‘सावरकर सौरभ’ के संपादक अउ अखिल भारतीय साहित्य परिषद छत्तीसगढ़ के प्रांत संयोजक प्रभात मिश्र ह बतायिन कि ए स्मारिका म स्वातंत्र्य वीर विनायक दामोदर सावरकर के जीवनकाल के घटना मन ल संपादित करके स्मारिका के रूप देय गे हे। स्मारिका म विभिन्न लेखक मन ह वीर सावरकर के जीवन के विभिन्न आयाम ल लेके अपन विचार व्यक्त करिन हे।
ए अवसर म अखिल भारतीय साहित्य परिषद, छत्तीसगढ़ ले रामेश्वर शर्मा, शिवरतन गुप्ता, मनीष शर्मा, संतोष बरलोटा, भास्कर किन्हेकर, अभय मिश्रा, कौशल साहू सहित अन्य गणमान्य जन उपस्थित रीहिन।