रायपुर। मुख्यमंत्री विष्णु देव साय ह आज राजधानी स्थित अपन निवास परिसर ले देश के पहली हाइड्रोजन फ्यूल लॉजिस्टिक ट्रक ल हरी झंडी दिखाके रवाना करिन। ओ मन ह अपन हस्ताक्षर करके हाइड्रोजन ट्रक के चालक ल चाबी सौंपिन अउ ए अभिनव पहल बर सीएसपीजीसीएल अउ अडानी नैचरल रिसोर्सेस ल शुभकामना दिन। ओमन ह कहिन कि ए पहल छत्तीसगढ़ अउ देश ल हरित ऊर्जा के कोती अग्रसर करइया क्रांतिकारी कदम होहि। मुख्यमंत्री ह कहिन कि छत्तीसगढ़ लगातार विकास करत हे अउ एमा आज एकठन नवा आयाम जुड़िन हे। भारत के पहली हाइड्रोजन फ्यूलड लॉजिस्टिक ट्रक के शुभारंभ छत्तीसगढ़ म होवत हे। ओमन ह कहिन कि हमर प्रधानमंत्री नरेंद्र मोदी के ग्रीन एनर्जी ल बढ़ावा दे म विशेष फोकस हे अउ ओमन ह साल 2070 तक भारत ल शून्य कार्बन उत्सर्जन वाला देश बनाए के जेन संकल्प लिन हे, ओला पाए के दिशा म ए पहल महत्वपूर्ण हे। पर्यावरण संरक्षण अउ औद्योगिक विकास के बीच संतुलन साधे म घलो ए कदम मददगार होही। साय ह कहिन कि छत्तीसगढ़ खनिज संपदा समृद्ध प्रदेश हे अउ ए ट्रक के उपयोग खनिज परिवहन म होए ले कार्बन उत्सर्जन म कमी आहि। ओमन ह कहिन कि प्रदेश म पारंपरिक संसाधन के संग-संग ग्रीन टेक्नोलॉजी अउ नवाचार ल घलो प्राथमिकता दे जात हे। साय ह कहिन कि विकास अउ पर्यावरण संरक्षण संग- संग संभव हें अउ अइसे पहल ले हमर संकल्प ल अउ मजबूती मिलहि।
ए मौके म अडानी एंटरप्राइजेज के नैचरल रिसोर्सेस के सीईओ डॉ. विनय प्रकाश ह घलो अपन विचार साझा करिन अउ ए पहल ल खनन क्षेत्र म सतत विकास बर मील के पत्थर बतायिन। कार्यक्रम म छत्तीसगढ़ राज्य बीज विकास निगम के अध्यक्ष चंद्रहास चंद्राकर, छत्तीसगढ़ स्टेट पावर जेनरेशन कंपनी लिमिटेड के प्रबंध संचालक संजीव कटियार अउ अडानी ग्रुप के प्रतिनिधि मौजूद रहिन।
हाइड्रोजन प्रचुर मात्रा म पाए जाए वाला तत्व हे अउ सबले विशेष बात ए कोनो भी प्रकार के हानिकारक उत्सर्जन नइ करय। हाइड्रोजन फ्यूल सेल ले चलइया वाहन डीज़ल ट्रक जतना दूरी अउ लोड उठाए के क्षमता रखथे। लेकिन धुआं के बजाए ये सिर्फ पानी के भांप अउ गर्म हवा उत्सर्जित करथे अउ आवाज़ घलो बहुत कम करथे। चूंकि माइनिंग क्षेत्र म अधिकांश मशीन मुख्य रूप ले डीज़ल ले ही चलथे, अइसे म स्वच्छ ईंधन ल अपनाए ले प्रदूषण अउ शोर ल कम करे म मदद मिलहि। एखर संग ही, ए कदम भारत के कच्चा तेल म निर्भरता घटाए अउ कार्बन फुटप्रिंट कम करे म घलो सहायक होहि। खास बात ये हे कि अडानी नैचरल रिसोर्सेस एशिया के पहली कंपनी हे, जेन ह ‘डोज़र पुश सेमी ऑटोनॉमस तकनीक ल अपनाए हे, जेखर ले सुरक्षा अउ स्थिरता, दुनों ल बढ़ावा मिलत हे।
गौरतलब हे कि भारतीय अउ अंतर्राष्ट्रीय तकनीकी साझेदारी ले ए ट्रक तैयार करे गिन हे अउ एमा ईंधन के तौर म हाइड्रोजन के उपयोग होहि। एखर अंतर्गत माल परिवहन बर हाइड्रोजन फ्यूल सेल बैटरी ले चलइया ट्रक विकसित करे जात हे। प्रत्येक ट्रक स्मार्ट तकनीक अउ तीन हाइड्रोजन टैंक ले लैस होहि, जेमा 200 किलोमीटर के दूरी तक 40 टन तक के माल ले जाए के क्षमता होहि। प्रदेश म हरित भविष्य ल सुरक्षित करे के उद्देश्य ले छत्तीसगढ़ स्टेट पावर जनरेशन कंपनी लिमिटेड अउ अदाणी नैचरल रिसोर्सेस ह ए साझा प्रयास करिन हे। छत्तीसगढ़ स्टेट पावर जेनरेशन कंपनी लिमिटेड द्वारा रायगढ़ जिला के गारे पेल्मा-3 कोल ब्लॉक ले राज्य के विद्युत उत्पादन इकाई तक कोयला परिवहन म एखर उपयोग करे जाहि।
