महिला अऊ बाल विकास मंत्री अनिला भेंड़िया ह आज रायपुर के सर्किट हाउस म आभा प्रसाद कोती ले लिखे गे पुस्तक ‘स्टेटस ऑफ वूमेन’ के विमोचन करिन। ओमन ह श्रीमति प्रसाद ल बधाई अऊ शुभकामना देत कहिन कि ‘स्टेटस ऑफ वूमेन’ किताब म महिला मन ले संबंधित कानून, प्रक्रिया अऊ नियम मन ल उल्लेखित करे गे हे। अक्ती के शुभ दिन विमोचन ले ए किताब ह जम्मो बर उपयोगी होही।
श्रीमती भेंड़िया ह कहिन कि महिला मन गृहस्थ जीवन अऊ लोग-लईका के व्यस्तता के सती अपन अंदर के क्षमता ल कई बार देख नई पाए। पढ़े लिखे जम्मो महिला मन ल अपन क्षमता ल पहचान के आगू बढ़ना चाही। सामाजिक बुता के माध्यम ले ओमन दूसर मन के मदद घलो कर सकथे। ए बेरा म सामाजिक कार्यकर्ता संजय श्रीवास्तव, कृषि महाविद्यालय के प्रोफेसर एम.एम. नागोरिया अऊ पूर्व विधि सचिव ए.के. सामंते ह महिला सशक्तिकरण ले आधारित ए किताब ल बहुत उपयोगी बताईन।
पुस्तक के लेखिका डॉ. आभा प्रसाद ह कहिन कि ज्यादातर महिला मन ल ओखर अधिकार के बारे में नई पता हे। ‘स्टेटस ऑफ वूमेन’ म महिला मन ले संबंधित विभिन्न कानून के समावेश करे गे हे। जेखर ले ए पुस्तक के माध्यम ले ओमन ल अपन अधिकार के जानकारी मिल सकथे।
