- सबले जादा निवेश वाला टॉप टेन राज्य म संघरिस छत्तीसगढ़
- मुख्यमंत्री साय के नेतृत्व म औद्योगिक क्रांति के रद्दा म हमर राज्य
- बछर 2025 म 218 परियोजना मन म 1.63 लाख करोड़ के निवेश
- राज्य म अब तक 4.4 लाख करोड़ रुपिया के औद्योगिक निवेश
छत्तीसगढ़ ह ए बछर याने 2025 म औद्योगिक निवेश के क्षेत्र म एक नवा कीर्तिमान स्थापित करे हे। प्रोजेक्ट टूडे के सर्वे कोती ले जारी रिपोर्ट के अनुसार, राज्य म 218 नवा परियोजना मन म 1,63,749 करोड़ रुपिया के नवेश आए हे, जेन ह देश के कुल निवेश के 3.71 प्रतिशत हे। यह उपलब्धि छत्तीसगढ़ ल देश के टॉप टेन निवेश वाला राज्य म संघारत हे। ए सफलता के पाछू मुख्यमंत्री विष्णु देव साय के दूरदर्शी नेतृत्व अऊ छत्तीसगढ़ सरकार के नवा औद्योगिक नीति 2024-30 के महत्वपूर्ण योगदान हे। बता देन कि बछर 2024 म होए निवेश ल मिलाके राज्य म अभी तक 4.4 लाख करोड़ रुपिया के औद्योगिक निवेश हो गे हे।
5 बछर म 5 लाख रोजगार
एक नवंबर 2024 ले लागू नवा औद्योगिक नीति 2024-30 ह छत्तीसगढ़ ल निवेशक मन बर एक आकर्षक राज्य बना दे हे। ए नीति म न्यूनतम शासन, अधिकतम प्रोत्साहन के सूत्र ल अपनाए गे हे, जेखर ले सिंगल विंडो सिस्टम 2.0, ऑनलाइन आवेदन अऊ त्वरित प्रोसेसिंग जैईसन सुविधा ल शुरू करे गे हे। ए नीति म फार्मास्यूटिकल्स, आईटी, आर्टिफिशियल इंटेलिजेंस (एआई), ग्रीन हाइड्रोजन, सेमीकंडक्टर अऊ पर्यटन जैईसे क्षेत्र मन बर विशेष प्रोत्साहन दे गे हे। उद्योग मन ल 30-50 प्रतिशत सब्सिडी, 5 ले 12 साल तक कर म छूट अऊ ब्याज अनुदान जैईसन प्रावधान ले निवेशक मन के भरोसा घलो बाढ़े हे। नीति म 1000 ले जादा रोजगार देवईया इकाई मन बर बी स्पोक पॉलिसी अऊ प्रति व्यक्ति 15,000 तक प्रशिक्षण अनुदान जईसन प्रावधान घलो संघरे हे। जेखर लक्ष्य अवईया 5 बछर म 5 लाख नवा रोजगार सृजित करना हे।
इनवेस्टर मीट के कई आयोजन
मुख्यमंत्री विष्णु देव साय के ए उदिम म निवेश ल आकर्षित करे बर देश के प्रमुख शहर दिल्ली, मुंबई अऊ बेंगलुरु म इन्वेस्टर्स कनेक्ट मीट के घलो आयोजन करे गे रिहिस। एमा देश-विदेश के प्रमुख उद्योगपति मन घलो संघरे रिहिन, जेखर परिणामस्वरूप 4.4 लाख करोड़ के निवेश प्रस्ताव राज्य ल मिले हे। मुंबई म आयोजित समिट म 6000 करोड़ के निवेश प्रस्ताव अऊ अमेरिका के संगे-संग रूस के कॉन्सल जनरल ले विदेशी प्रत्यक्ष निवेश के सहमति मिले हे। दिल्ली म 15,184 करोड़ अऊ बेंगलुरु म ऊर्जा क्षेत्र म निवेश के सहमति ह छत्तीसगढ़ के औद्योगिक क्षमता ल रेखांकित करे हे। मुख्यमंत्री साय ह उद्योगपति मन ल आश्वस्त घलो करे हे कि छत्तीसगढ़ सरकार पारदर्शी अऊ निवेशक अनुकूल नीति के हरसंभव सहयोग देही।
300 ले जादा सुधार
छत्तीसगढ़ सरकार ह पाछू के एक बछर म 300 ले जादा सुधार लागू करे हे, जेखर ले कागजी प्रक्रिया ल कम कर कारोबारी माहौल म पारदर्शी अऊ तेजी बनाए के उदिम शामिल हे। सिंगल विंडो सिस्टम 2.0 ले जम्मो स्वीकृति अऊ लाइसेंस आसानी ले उपलब्ध हे। अऊ त अऊ सब्सिडी जारी करे के प्रक्रिया ल 7 दिन के अंदर करे के बेरा सीमित करे गे हे। ए जम्मो सुधार छोटे व्यापारी मन ले लेके बड़े उद्योगपति मन ल छत्तीसगढ़ ल एक पसंदीदा गंतव्य बना दे हे।
अब रायपुर म बनही सेमी कंडक्टर
छत्तीसगढ़ म पहली बार सेमीकंडक्टर, डेटा सेंटर अऊ एआई आधारित उद्योग मन बर निवेश प्रस्ताव मिले हे। हाल ही के बेरा म राज्य के पहिली सेमीकंडक्टर प्लांट के भूमिपूजन होए हे, जेन तकनीकी नवाचार के दिशा म एक बड़का कदम हे। नवा रायपुर ल बेंगलुरु अऊ हैदराबाद के तर्ज म आईटी हब के रूप म विकसित करे के योजना हे। जेमा नैसकॉम संग समझौता ह एक महत्वपूर्ण कदम हे।
“छत्तीसगढ़ के नवा औद्योगिक नीति सिरिफ उद्योग मन के स्थापना ल बढ़ावा देथे, भलकून रोजगार सृजन अऊ आर्थिक समृद्धि म घलो जोर देथे। हमार लक्ष्य अमृतकाल- छत्तीसगढ़ विजन 2047 नवा अंजोर के तहत विकसित भारत के निर्माण म योगदान देना हे। ए जम्मो निवेश ले न सिरिफ आर्थिक प्रगति ल नवा गति मिलही, भलकून हजारों युवा मन ल रोजगार के नवा रद्दा घलो मिलही। छत्तीसगढ़ अब नक्सल प्रभावित छवि ले बाहिर निकलके एक औद्योगिक अऊ तकनीकी हब के रूप म उभरत हे। राज्य नवा ऊंचाई छुए बर तैयार हे, जे देश के आर्थिक विकास म एक महत्वपूर्ण योगदान दिही। “
– विष्णुदेव साय, मुख्यमंत्री छत्तीसगढ़
