अरूना के घर अब सुरुज के अंजोर म जगमगावत हे, बिजली बिल के चिंता ले मिलिस मुक्ती
3 किलोवाट के सोलर प्लांट ह बदल दिस राजपुर के अरूना के जिनगी, बचत के संग पर्यावरण बचाय के घलो संदेस
रायपुर, ‘प्रधानमंत्री सूर्य घर मुफत बिजली योजना’ के मकसद एक करोड़ घर म छत (रूफटॉप) म सोलर पैनल लगाना अऊ हर महीना 300 यूनिट तक मुफत बिजली देना आय। ए योजना के लाभ उठाके कोनो घलो अपन घर म साफ अऊ सस्ता बिजली पा सकत हे। बाढ़त महंगाई के बखत म बिजली के भारी-भरकम बिल ह कोनो घलो मध्यमवर्गीय परिवार बर चिंता के बात होथे। फेर बलरामपुर जिला के राजपुर विकासखंड के अरूना कश्यप ह ए चुनौती ला एक मौका म बदल दिस। प्रधानमंत्री सूर्य घर योजना ला अपनाके अरूना ह न केवल अपन बिजली बिल ला जीरो करे के कोति बढ़त हे, बल्कि ओ ह क्षेत्र के आन परिवार बर घलो एक ठन मिसाल बन गे हे।
बाढ़त खरचा के बीच सोलर बनीस सहारा
अरूना कश्यप ह बताइस कि बाढ़त जरूरत के संग हर महीना आने वाला बिजली के बड़े बिल ह ओकर घर के बजट ला बिगाड़ देत रहिस। ओ ह कहिथे— “पहिले बिजली के खरचा लगातार बढ़त रहिस, जेकर ले घर के तालमेल बिठाना मुस्किल हो गे रहिस। फेर जब मोला प्रधानमंत्री सूर्य घर योजना अऊ ओ म मिलने वाला केंद्र अऊ राज्य सरकार के सब्सिडी के बारे म पता चलिस, तब मोला लगिस कि ये हमर बर सबले बढ़िया समाधान आय।”
3 किलोवाट के प्लांट: राहत के नवा किरन
अरूना ह विभाग के मदद ले अपन घर के छत म 3 किलोवाट के सोलर पावर प्लांट लगवाइस हे। सुरू म ओला लागत रहिस कि ये काम ह अब्बड़ ओझरावन (जटिल) होही, फेर सासन के मदद अऊ रद्दा देखावे ले ये काम ह आसान हो गे। प्लांट लगे के बाद बिजली बिल म भारी कमी आई हे। अब घर के सब्बो जरूरी सामान बिना कोनो चिंता के सौर ऊर्जा ले चलत हें। अरूना के मानना हे कि सौर ऊर्जा ले सिरिपुन पइसा के बचत नहीं होवय, बल्कि ये ह पर्यावरण ला सुरक्षित रखे बर घलो एक बड़े योगदान आय।
आत्मनिर्भरता कोति बढ़त कदम
श्रीमती अरूना ह सासन-प्रसासन के आभार जतावत कहिस कि ये योजना ह आम परिवार ला सस्ता अऊ साफ बिजली दे के सबले मजबूत जरिया आय। सब्सिडी के सुविधा ले ये तकनीक ह आम मनखे के पहुंच म आ गे हे। ओ ह कहिथे कि यदि हर घर सौर ऊर्जा ला अपनाही, त न केवल बिजली के बचत होही बल्कि हमर पर्यावरण घलो प्रदूषण ले बचे रही।
योजना के लाभ
प्रधानमंत्री सूर्य घर योजना के तहत पात्र हितग्राही ला सोलर प्लांट लगाय बर सुग्घर सब्सिडी दे जावत हे। एकर ले आम मनखे अपन छत के उपयोग करके खुद बिजली बना सकत हें अऊ आर्थिक रूप ले मजबूत बन सकत हें।