रायपुर। विकसित भारत के सपना ल साकार करे के दिशा म छत्तीसगढ़ एक अउ बड़का छलांग लगाए जात हे। देश के प्रतिष्ठित कंपनी करमवीर इलेक्ट्रॉनिक्स लिमिटेड ह रायपुर म अत्याधुनिक ट्रांसफॉर्मर निर्माण इकाई स्थापित करे के प्रस्ताव मुख्यमंत्री विष्णुदेव साय के समक्ष प्रस्तुत करिन। ए इकाई म 300 करोड़ रुपया ले अधिक के निवेश करे जाहि, जेखर ले छत्तीसगढ़ के नाम देश के सबले बड़का ट्रांसफॉर्मर निर्माण केंद्र म शामिल हो जाहि।
ए अवसर म कंपनी के प्रबंध निदेशक विवेक जैन ह मुख्यमंत्री ले छत्तीसगढ़ सदन, नवा दिल्ली म मुलाकात करिन। बइठक म प्रस्तावित परियोजना के रूपरेखा, निवेश संभावना अउ रोजगार सृजन के आयाम म विस्तार ले चर्चा होइस। जैन ह बतायिन कि ए यूनिट तकनीकी दृष्टि ले देश के सबले उन्नत ट्रांसफॉर्मर निर्माण इकाई होहि, जेन भविष्य म ऊर्जा क्षेत्र के ज़रूरत ल पूरा करे म मील के पत्थर साबित होहि।
मुख्यमंत्री विष्णुदेव साय ह निवेश प्रस्ताव के स्वागत करत कहिन, “हमारा लक्ष्य हे कि छत्तीसगढ़, विकसित भारत 2047 के निर्माण म एक मजबूत स्तंभ बनहि। ए निवेश सिर्फ एक औद्योगिक इकाई नहीं, बल्कि छत्तीसगढ़ के तकनीकी क्षमता अउ आत्मनिर्भरता के दिशा म एक मजबूत कदम हे। राज्य सरकार ए परियोजना ल हरसंभव सहायता प्रदान करहि।”
ए परियोजना राज्य म बिजली क्षेत्र के आधुनिकीकरण, स्थानीय युवा मन बर रोजगार, अउ उद्योग आधारित विकास ल गति दिही। विशेष रूप ले ये पहल “मेक इन छत्तीसगढ़” के नारा ल मजबूती देथे, जिहां अब अत्याधुनिक तकनीक ले बने ट्रांसफॉर्मर पूरा देश ल रोशन करे के कार्य करहि। ए अवसर म मुख्यमंत्री के प्रमुख सचिव सुबोध सिंह नवा दिल्ली म छत्तीसगढ़ के इनवेस्टमेंट कमिश्नर ऋतु सेन घलो उपस्थित रीहिन ।
