रायपुर। प्रधानमंत्री नरेन्द्र मोदी ह आज अपन मन की बात के 122वां कड़ी म देश के सामने अपन बात ल रखिन। मन की बात के ये कड़ी छत्तीसगढ़ बर काफी खास रहिन। प्रधानमंत्री ह छत्तीसगढ़ म मुख्यमंत्री विष्णुदेव साय के नेतृत्व म करे जात कार्य के तारीफ करत कहिन कि जेन दंतेवाड़ा म कभु माओवाद चरम म रीहिन, उहां आज शिक्षा के परचम लहरात हे। प्रधानमंत्री ह अपन संबोधन म छत्तीसगढ़ म हुए बस्तर ओलंपिक अउ माओवाद प्रभावित क्षेत्र म साइंस लैब के बारे म जिक्र करिन। ओमन ह कहिन कि छत्तीसगढ़ के माओवाद प्रभावित क्षेत्र के लइका मन म साइंस के पैशन हे अउ वो खेल म घलो कमाल करत हे।
प्रधानमंत्री ह बस्तर क्षेत्र के जिक्र करत कहिन कि ए तरह के प्रयास ले पता चलथे कि ए इलाका म रहइया लोगन मन कतना साहसी होथे। ए लोगन मन ह तमाम चुनौती के बीच अपन जीवन ल बेहतर बनाए के राह चुनिस हे। प्रधानमंत्री ह कहिन कि मोला ए जानके घलो बड़ खुशी होथ हे कि 10वीं अउ 12वीं के परीक्षा म दंतेवाड़ा जिला के नतीजा बहुत शानदार रहिन। करीब पंचानबे ( नाइंटी पाइव) प्रतिशत रिजल्ट ये जिला 10वीं के नतीजा म टॉप म रहिन, उहें 12वीं के परीक्षा म ए जिला ह छत्तीसगढ़ म छठा स्थान हासिल करिन। प्रधानमंत्री नरेन्द्र मोदी ह देशवासी ले बस्तर क्षेत्र के उदाहरण देवत कहिन कि अइसे बदलाव हमन झन ल गर्व ले भर देथे। प्रधानमंत्री नरेन्द्र मोदी ह मन की बात के 122वीं कड़ी म बस्तर क्षेत्र अउ दंतेवाड़ा के जिक्र करे म छत्तीसगढ़ के मुख्यमंत्री विष्णुदेव साय ह प्रधानमंत्री के आभार व्यक्त करिन। मुख्यमंत्री ह कहिन कि छत्तीसगढ़ के सरकार प्रधानमंत्री के विकसित भारत के नक्शा कदम म चलत हे अउ विकसित छत्तीसगढ़ ए अभियान म अपन महत्वपूर्ण योगदान निभाहि।
