रायपुर। विप्र पब्लिक स्कूल, रायपुर के नव-निर्मित भवन के लोकार्पण जगद्गुरु शंकराचार्य स्वामी सदानंद सरस्वती महाराज के करकमल ले संपन्न होइस। ए अवसर म राज्यपाल रमेन डेका मुख्य अतिथि के रूप म उपस्थित रीहिन। अपन संबोधन म राज्यपाल ह कहिन कि केवल डिग्री प्राप्त करना ही शिक्षा नई हे, बल्कि ए हमर व्यक्तित्व ल संवारे अउ समाज के प्रति जिम्मेदार बने के प्रक्रिया हे।
अपन उद्बोधन म राज्यपाल डेका ह विप्र शिक्षा समिति अउ विप्र कॉलेज के 30 बछर के शिक्षायात्रा ल गौरवपूर्ण बतात जम्मों पदाधिकारी मन ल शुभकामना दिन। ओमन ह कहिन कि ए संस्थान न केवल शिक्षा के केंद्र हे, बल्कि ए ज्ञान, सेवा अउ संस्कृति के संगम हे।
राज्यपाल डेका ह कहिन कि “आज जब पूरा विश्व डिजिटल क्रांति अउ आर्टिफिशियल इंटेलिजेंस के दिशा म आगु बढ़त हे, तब अइसे शिक्षा के जरूरत हे जेन आधुनिकता के संग-संग हमन ल हमर जड़ अउ भारतीय जीवन मूल्य ले घलो जोड़े रखय।
राज्यपाल ह डेका कहिन कि भवन कइसे हे यह न देखत हुए उहां कइसन शिक्षा मिलत हे ये देखे जाए। हमन अइसे शिक्षा देना हे जोन स्थानीय भाषा अउ सांस्कृतिक समझ के संग-संग विज्ञान, गणित अउ तकनीकी शिक्षा ल समन्वित करहि। ओमन ह विश्वास व्यक्त करिन कि नव-निर्मित भवन अवइया बछर म शिक्षा के गुणवत्ता के प्रतीक बनहि।
डेका ह कहिन कि देश म गुरूकुल परंपरा ल स्थापित करे म ब्राह्यण समाज के बहुत बड़का योगदान हे। ब्राह्यण समाज ह सदैव शिक्षा अउ नैतिकता अउ सामाजिक मार्गदर्शन ल अपना कर्त्तव्य माने हे।
ए अवसर म जगद्गुरु शंकराचार्य स्वामी सदानंद सरस्वती जी महाराज ह अपन आर्शीवचन दिन। कार्यक्रम म सांसद बृजमोहन अग्रवाल, विधायकगण राजेश मूणत, पुरंदर मिश्रा, अनुज शर्मा, रायपुर के महापौर मीनल चौबे, पूर्व मंत्री रवींद्र चौबे ह घलो अपन संबोधन दिन। ए अवसर म संतगण सहित बड़का संख्या म शिक्षक, अभिभावक, विद्यार्थी अउ विप्र समाज के गणमान्य नागरिक उपस्थित रीहिन।
